শদিয়া, 8 জুন : আৰ্থিক দৈন্যতা যে সফলতাৰ হেঙাৰ হব নোৱাৰে তাকে প্ৰমাণ কৰিলে কাকপথাৰৰ সুনিতা সিঙে ৷ সদ্যঘোষিত হাইস্কুল শিক্ষান্ত পৰীক্ষাৰ ফলাফলত ৮৭.৬৭ শতাংশৰে গৌৰৱ কঢ়িয়াই আনিছে কাকপথাৰলৈ ৷ কাকপথাৰ গন্ধিগুৰী ফৰেষ্টগেটৰ খৰি বিক্ৰী কৰা নতুবা দিন হাজিৰা কৰা ৰাজেশ সিঙে কন্যা সুনিতাক কাকপথাৰৰ ৰাধাকৃষ্ণন একাডেমিত নামভৰ্ত্তি কৰাইছিল ৷ ছাত্ৰীগৰাকীৰ ঘৰৰ অৱস্থা আৰ্থিকভাবে টনকীয়াল নোহোৱাৰ কথা অনুধাৱন কৰি বিদ্যালয়খনেও বিভিন্ন ক্ষেত্ৰত ৰেহাইৰ ব্যৱস্থা কৰিছিল ৷
লগতে পঢ়কঃ দৰিদ্ৰতাক নেওচি সৰ্বোচ্চ নম্বৰেৰে শীৰ্ষত বৰ্ণালী দেৱী
সুনিতাই ইংৰাজী, অংক, বিজ্ঞান, সমাজ বিজ্ঞান আৰু ঐচ্ছিক অংকত লেটাৰ সহ সৰ্বমুঠ ৫২৩ নম্বৰে ৮৭.৬৭ শতাংশৰে নিজ বিদ্যালয়ৰ লগতে কাকপথাৰলৈ সু-নাম কঢ়িয়াই আনিছে ৷ ভৱিষ্যতে বিজ্ঞান শাখাত নামভৰ্তি কৰি চিকিৎসক হোৱাৰ আশা পুহি ৰখা ছাত্ৰীগৰাকীৰ উচ্চ শিক্ষাৰ বাবে এতিয়া লাগে চৰকাৰ, জন প্ৰতিনিধি, দল-সংগঠন তথা সদাশয় ৰাইজৰ সহায় সহযোগিতা ৷
