তিনিচুকীয়া, 31 জুলাই : ৰাজ্যত নিষিদ্ধ ব্যৱসায়ৰ বিৰুদ্ধে অসম আৰক্ষীৰ তীব্ৰ অবিযানৰ মাজতে ডিগবৈত চোৰাং তেলৰ ব্যৱসায়ীৰ বিৰুদ্ধে চলিল আৰক্ষীৰ অভিযান ৷ অভিযানত তিনিচুকীয়া জিলাৰ ডিগবৈত এখন টেংকাৰসহ আৰক্ষীৰ জালত পৰিছে এটা বৃহৎ তেল চুৰি চক্ৰ ৷ তিনিচুকীয়া জিলাৰ অতিৰিক্ত আৰক্ষী অধীক্ষক ৰিপুঞ্জয় কাকতিৰ নেতৃত্বত আৰু ডিগবৈ আৰক্ষীৰ সহযোগত চলিছিল এই অভিযান ৷ অভিযানত ডিগবৈৰ লক্ষীপথাৰ মামৰনিৰ অইল ইণ্ডিয়া লিমিটেডৰ 10 নম্বৰ খাদৰ পৰা হাৰিয়ানাৰ পঞ্জীকৃত এখন 14 চকীয়া তেলৰ টেংকাৰসহ মুঠ 9 জনকৈ লোকক আটক কৰে আৰক্ষীয়ে ৷
উল্লেখ্য যে, আৰক্ষীয়ে গোপন সূত্ৰৰ পম খেদি শুকুৰবাৰে পুৱতি নিশা এই অভিযান চলাইছিল ৷ অভিযানত আৰক্ষীৰ দলটোৱে 38 নং ৰাষ্ট্ৰীয় ঘাইপথত এন আৰ এল পেট্ৰল ডিপুৰ সমীপৰ পৰা কৰায়ত্ব কৰে তেল চোৰৰ চক্ৰটোক ৷ উক্ত তেল চুৰি চক্ৰটোৱে টেংকাৰখনত লক্ষীপথাৰৰ বগাপানী 5 নং খাদৰ পৰা খাৰুৱা তেল ভৰ্তি কৰি আহি থাকোতেই আৰক্ষীৰ জালত পৰে ৷ আৰক্ষীৰ দলটো দেখি তেল চুৰৰ চক্ৰটোৱে পলাবলৈ চেষ্টা কৰিছিল যদিও 9 জনকৈ তেলচোৰৰ লগতে তেল ভৰ্তি টেংকাৰখন জব্দ কৰে আৰক্ষীয়ে ৷
জব্দ হোৱা টেংকাৰখনৰ নম্বৰ-HR-61 D-9677 বুলি জানিবলৈ দিছে আৰক্ষীয়ে ৷ টেংকাৰখনৰ মুঠ 5 টা চেম্বাৰত 4 হেজাৰ লিটাৰকৈ মুঠ 20 হেজাৰ লিটাৰ খাৰুৱা তেল আছিল বুলি প্ৰকাশ কৰিছে আটকাধীন চক্ৰটোৱে ৷
এই অভিযানত আটক হোৱা লোকসকলৰ ভিতৰত আছে কুখ্যাত তেল চোৰ তিনিচুকীয়াৰ লোহাৰী কছাৰী গাঁৱৰ লোহিত দুৱাৰা (44) , তিনিচুকীয়াৰ ভীমপাৰাৰ কৰ্ণ চেতিয়া ( 38), শুকানপুখুৰীৰ নৰেন বৰা( 31), বালুগাডাৰ সঞ্জয় যাদৱ (32), জিতেন্দৰ চাহ ( 28), লক্ষীপথাৰৰ ৰুনুজ্যোতি গগৈ (50) আৰু মন্টু গগৈ (35), উত্তৰ প্ৰদেশৰ মুজাফাৰ নগৰৰ নৰেন্দ্ৰ কুমাৰ (44) আৰু মদন কুমাৰ (30) ৷ বিগত কেইবা বছৰ ধৰি অইলৰ কৰ্মচাৰী, নিৰাপত্তাৰক্ষী তথা তেল চুৰৰে গঠিত বৃহৎ চক্ৰটোৱে আৰক্ষীৰ চকুত ধূলি মাৰি এইদৰেই খাৰুৱা তেল চুৰি কৰি দৈনিক লাখ লাখ টকা লুণ্ঠন কৰি আহিছিল ৷ দুৰ্ভাগ্যক্ৰমে শুকুৰবাৰে আৰক্ষীৰ জালত পৰা চক্ৰটোৰ সতে জড়িত আৰু বহুকেইজন লোক অচিৰেই আৰক্ষীৰ জালত পৰাৰ সম্ভাৱনা আছে বুলি আৰক্ষীয়ে জানিবলৈ দিছে ৷ এইসকল কোনোপধ্যেই যাতে হাৰি যাব নোৱাৰে তাৰকাৰনে কঠোৰ ব্যৱস্থা গ্ৰহণ কৰিবলৈ প্ৰশাসনক সচেতন মহলে দাবী জনাইছে ৷
লগতে পঢ়কঃ অসমৰ মুখ্যমন্ত্ৰীয়ে ৰাতিপুৱা এটা দুপৰীয়া এটা কথা কয়: লুৰীণজ্যোতি গগৈ
