তালাপত গৌৰাংগ চন্দ্ৰ দেৱ’ক বিনাৰ্চত্তে মুক্তিৰ দাবীত প্ৰতিবাদত বহিল দুৰ্ভগীয়া কন্যা

তালাপত অপহৃত চাহ কৰ্মচাৰী গৌৰাংগ চন্দ্ৰ দেৱ’ক বিনাৰ্চত্তে মুক্তিৰ দাবীত দুৰ্ভগীয়া কন্যাই বহিল অৱস্থান ধৰ্মঘটত ৷ সদৌ অসম বাঙালী যুৱ-ছাত্ৰ ফেডাৰেচনৰ উদ্যোগত তালাপত তিনিঘন্টীয়া অৱস্থান ধৰ্মঘট ৷

শদিয়া, ২৩ অক্টোবৰঃ তিনিচুকীয়াৰ ধলাৰ শংকৰ চাহ বাগিচাৰ অপহৃত হেডফিটাৰ গৌৰাংগ চন্দ্ৰ দেৱ’ক উদ্ধাৰৰ দাবীত সদৌ অসম বাঙালী যুৱ-ছাত্ৰ ফেডাৰেচনৰ তিনিচুকীয়া জিলা সমিতিৰ উদ্যোগত তালাপত বুধবাৰে ৰূপায়ণ কৰা হয় তিনিঘন্টীয়া অৱস্থান ধৰ্মঘট কাৰ্যসূচী ৷ এই কাৰ্যসূচীত প্ৰতিবাদকাৰীসকলৰ সৈতে সংগ দিয়ে অপহৃতৰ দুৰ্ভগীয়া কন্যা প্ৰিয়ংকাই ৷ অপহৃত চাহ কৰ্মচাৰী দেৱ’ক উদ্ধাৰ কৰাত চৰম ব্যৰ্থতাক উদঙাই দিয়া সেনা-আৰক্ষী তথা তিনিচুকীয়া জিলা প্ৰশাসনক ক্ষুৰধাৰ সমালোচনা আৰু চৰকাৰ বিৰোধী শ্ল’গানেৰে তালাপৰ আকাশ-বতাহ উত্তাল কৰি তোলে প্ৰতিবাদকাৰীসকলে ৷ অৱস্থান ধৰ্মঘটস্থলীৰ পৰাই দুৰ্ভগীয়া কন্যা প্ৰিয়ংকাই পিতৃ গৌৰাংগ চন্দ্ৰ দেৱ’ক বিনাৰ্চত্তে মুক্তি দিবলৈ পুনৰবাৰ আলফা স্বাধীনক কাতৰ আহ্বান জনায় ৷

লগতে চাওকঃ তিনিচুকীয়াৰ শংকৰ চাহ বাগিচাৰ হেড ফিটাৰ গৌৰাং সোন্দৰ দেৱ’ক অপহৰণ

ইপিনে এখন স্মাৰক পত্ৰ ডুমডুমা ৰাজহ চক্ৰ বিষয়াৰ যোগেদি জিলা উপায়ুক্তলৈ প্ৰেৰণ কৰি শীঘ্ৰে অপহৃত গৌৰাংগ চন্দ্ৰ দেৱ’ক অপহৰণকাৰীৰ কবলৰ পৰা উদ্ধাৰ কৰিবলৈ দাবী জনায় প্ৰতিবাদকাৰীসকলে ৷ অন্যথা সমগ্ৰ তিনিচুকীয়াতে ধাৰাবাহিক আন্দোলন গঢ়ি তুলিব বুলিও জিলা উপায়ুক্তক বাঙালী যুৱ-ছাত্ৰ ফেডাৰেচনৰ নেতৃত্বই হুংকাৰ দিয়ে ৷

উল্লেখ্য যে চাহ কৰ্মচাৰী গৌৰাংগ চন্দ্ৰ দেৱ’ক যোৱা ১১ অক্টোবৰত শংকৰ চাহ বাগিচাৰ কলঘৰৰ পৰাই অপৰহৰণ কৰি নিছিল আলফাই ৷ অপহৃতক উদ্ধাৰ কৰাত সেনা-আৰক্ষী সম্পূৰ্ণৰূপে ব্যৰ্থ হোৱাৰ সময়তে আলফা(স্বাঃ)ৰ সদস্যই টেলিফোনযোগে গৌৰাংগ চন্দ্ৰ দেৱ’ৰ শেহতীয়া স্থিতিৰ বিষয়ে যোৱা ১৮ অক্টোবৰত দুৰ্ভগীয়া কন্যা প্ৰিয়ংকাক অৱগত কৰিছিল ৷ চাহ উদ্যোগপতি সুধিৰ কুমাৰ লোহিয়াই অপহৃত গৌৰাংগ চন্দ্ৰ দেৱ’ক মুক্তিৰ সন্দৰ্ভত যোগাযোগ নকৰাৰ কথাও আলফাই প্ৰিয়ংকাক স্পষ্ট কৰি দিছিল ৷

লগতে চাওকঃ অপহৃত গৌৰাংগ দেৱৰ কন্যালৈ আলফা স্বাধীনৰ ফোন