তিনিচুকীয়া, 21 নৱেম্বৰ : তিনিচুকীয়া জিলাত অব্যাহত আছে চোৰাং কাঠ আৰু চোৰাং গৰুৰ সৰবৰাহ ৷ শুকুৰবাৰে ধলাৰ মেগেলা গাঁৱত চোৰাং কাঠভৰ্তি ট্ৰাক স্থানীয় ৰাইজে জব্দ কৰাৰ পাছতেই শনিবাৰে ধলাৰ ২ নং দীঘল মেচাকীত অৰুণাচল প্ৰদেশলৈ সৰবৰাহ কৰা ২৬ টাকৈ গৰু স্থানীয় দল সংগঠনে জব্দ কৰে । বৰডুমচা বজাৰৰ পৰা অৰুণাচল প্ৰদেশলৈ লৈ যোৱাৰ পথতে ধলাৰ ২ নং দীঘল মেচাকী গাঁৱত কেইবাটাও দল-সংগঠনৰ বিষয়ববীয়াই গৰু ভৰ্তি বাহনখন জব্দ কৰে ৷
উল্লেখ্য যে, গৰু কঢ়িয়াই অনা বাহনখনৰ চালকে লীলাম্বৰ সোণোৱাল নামৰ ব্যক্তি এজনৰ নামত ৭ লাখ ৩০ হাজাৰ টকাৰ এখন ৰচিদ দেখুৱাই যদিও ৰচিদখনত কোনো চীল-মোহৰ নথকাত গৰুকেইটা অবৈধভাৱে সৰবৰাহ কৰা বুলি উল্লেখ কৰে | এমাহ পূৰ্বৰ পৰা বৰডুমচা বজাৰৰ পৰা অসম-অৰুণাচলৰ সীমান্ত পথেৰে চোৰাং গৰুৰ সৰবৰাহ হোৱা বুলি দল-সংগঠনসমূহে অভিযোগ কৰিছিল যদিও আৰক্ষী আৰু বনবিভাগৰ সঠিক তদন্ততহে বিষয়তো স্পষ্ট হ'ব ।
