ৰঙাপৰা, 21 জানুৱাৰী : পশ্চিমবংগৰ মালদা ৰেল ষ্টেচনত ৰহস্যজনক অৱস্থাত উদ্ধাৰ অসমৰ শ্ৰমিকৰ মৃতদেহ ৷ মৃত শ্ৰমিকজন মিছামাৰীৰ প্ৰেম পাত্ৰ নাগ বুলি চিনাক্ত কৰিছে আৰক্ষীয়ে ৷ ৰেলযোগে নিজ গৃহলৈ আহি থকাৰ সময়তে মৃত্যু হয় লোকজনৰ ৷ শোণিতপুৰ জিলাৰ মিছামাৰী আৰক্ষী থানাৰ অন্তৰ্গত ৰিকামাৰী গাঁৱৰ নিৱাসী প্ৰেম দৰ্শন নাগৰ পুত্ৰ প্ৰেম পাত্ৰ নাগে (46) বিগত আঠ মাহ ধৰি হিমাচল প্ৰদেশৰ কুলু নামৰ ঠাইত শ্ৰমিক হিচাপে নিয়োজিত হৈ আছিল ৷ দুদিন পূৰ্বে প্ৰেম পাত্ৰ নাগে হিমাচলৰ কুলুৰ পৰা ৰেলযোগে স্ব গৃহলৈ আহিছিল ৷ কিন্তু স্বগৃহলৈ আহি থকা লোকজনৰ মৃতদেহ পশ্চিমবংগৰ মালদা ৰেল ষ্টেচনত ৰেলৱে আৰক্ষীয়ে উদ্ধাৰ কৰে ৷
প্ৰেম পাত্ৰ নাগৰ মৃত্যুৰ খবৰ পৰিয়ালে লাভ কৰাৰ পাছতেই হাহাকাৰ পৰিস্থিতিৰ সৃষ্টি হয়। ইতিমধ্যে ঘটনাস্থলীলৈ ৰাওনা হৈছে প্ৰেম পাত্ৰ নাগৰ পৰিয়ালৰ লোক ৷ মৃত লোকজনৰ পত্নী আৰু দুই কন্যাই এই ঘটনাক এক হত্যাকাণ্ড বুলি সন্দেহ কৰিছে ৷
