ৰঙাপৰা , ০৪ জুলাই : বৃহস্পতিবাৰে শোণিতপুৰ জিলাৰ বালিপৰাৰ সৰুপাটগাঁও খেলমাটিত ৰাইজে তিনিটা দুৰ্ধৰ্ষ ডকাইতক আটক কৰিবলৈ সক্ষম হয় । তথ্য অনুসৰি, শুকুৰবাৰে নিশা গুৱাহাটীৰ পৰা বিশ্বনাথ চাৰিআলিলৈ AS-25-DC-9578 নম্বৰৰ বলেৰ পিকআপ ভেন গাড়ী এখনে মাছ কঢ়িয়াই আহি আছিল । নিশা প্ৰায় ২ মান বজাত যোৰাবাটৰ ওচৰত এখন মাৰুতি ভানে উক্ত গাড়ীখন আগচি ধৰে আৰু ডকাইতৰ দল এটাই মালবাহী গাড়ী খনত উঠি লয় ।
ইয়াৰ পাচতে ডকাইতৰ দলটোৱে গাড়ীখনৰ চালক আৰু হেণ্ডিমেনজনক পিষ্টল দেখুৱাই গাড়ীখন ডকাইটি কৰি বালিপৰাৰ সৰুপাটগাঁও খেলমাটি লৈ আহে । পুৱতি নিশা গাড়ীখনত থকা বকোৰ গলাগুৰিৰ চালক তথা স্বত্বাধিকাৰী জাকিৰ হুছেইন আৰু গোৱালপাৰাৰ ৰাখালডুবিৰ হেণ্ডিমেন ছয়দ্দিন ইছলামে চিঞৰ বাখৰ কৰাত স্থানীয় ৰাইজ ওলাই আহে । ৰাইজে খেদি খেদি গাড়ীখনত থকা ডকাইতৰ দলটোৰ তিনিজনক আটক কৰি উত্তম মধ্যম সোধাই চাৰিদুৱাৰ আৰক্ষীক গতাই দিয়ে । ইফালে গাড়ীখনত থকা আন তিনিজন ডকাইত পলাই যাবলৈ সক্ষম হয় । ডকাইতকেইটাই চালকজনৰ পৰা ১০ হাজাৰ টকা লুট কৰি লৈ যায় বুলি চালকজনে জানিবলৈ দিয়ে । ধৃত ডকাইত তিনিজন ক্ৰমে মৰিগাঁৱৰ মানিক বিশ্বাস, বৰপেটাৰ হাইডৰ আলী আৰু ধুবুৰীৰ ওমান আলী বুলি চিনাক্ত কৰা হৈছে ।
