তেজপুৰ, 3 জুলাইঃ 1962 চনৰ সেই দিনবোৰত অসমত বিৰাজ কৰিছিল এক আতংকময় পৰিৱেশে ৷ চীনা সৈন্যই "বোমডিলা" অধিকাৰ কৰি আহি তেজপুৰ চহৰৰ একেবাৰে দুৱাৰডলিত উপনীত হৈছিল ৷ ইতিমধ্যে তেজপুৰ চহৰ এৰি পলায়ন কৰিছিল প্ৰশাসনিক বিষয়াৰ পৰা আৰম্ভ কৰি কাৰ্যালয়ৰ বিষয়া কৰ্মচাৰীও ৷ মুকলি কৰি দিয়া হৈছিল কাৰাবন্দীৰ লগতে মানসিক চিকিৎসালয়খনৰ ৰোগীক ৷ তেজপুৰ জাহাজ ঘাটত দৈনিক ফেৰীৰে হাজাৰ হাজাৰ লোক তেজপুৰ এৰি পলায়ন কৰিছিল ৷ চীনা সৈন্যৰ জয়গান গাই তেজপুৰৰ বাটে পথে ঘূৰি ফুৰিছিল মানসিক ৰোগীবোৰ ৷ সেই সময়ছোৱাত Youth Emergency Organisation য়ে অৰ্থাৎ তেজপুৰৰ কেইজনমান যুৱকৰ এটা সংগঠনে পাৰ্যমানে ৰাইজক সহায় কৰি গৈছিল ৷
লগতে পঢ়কঃ শিৱসাগৰত মূল্যবৃদ্ধিৰ বিৰুদ্ধে সৰ্ব ভাৰতীয় শ্ৰম সংস্থা সমন্বয় সমিতিৰ প্ৰতিবাদী সমদল
কিন্তু সেইসময়ছোৱাত তেজপুৰত এক অৰাজক পৰিস্থিতিয়ে বিৰাজ কৰিছিল ৷ সমগ্ৰ জিলাখনত আঙুলিমূৰত গণিব পৰাকৈ মানুহ আছিল ৷ তেতিয়ালৈ এই কথা পৰিষ্কাৰ হৈ গৈছিল যে বিজয়ী চীনা সৈন্যৰ গতিক অসমৰ সীমান্তত ৰুদ্ধ কৰিব পৰা সক্ষমতা ভাৰতীয় সৈন্যৰ নাই ৷ সেয়ে তেজপুৰবাসীৰ দায়িত্ব এৰি ইতিমধ্যে পলায়ন কৰিছিল প্ৰশাসন ৷ আনহাতে নিজেও নাপালে আনকো নিদিও মানসিকতাৰে ৰাইজে তেজপুৰ উপায়ুক্ত কাৰ্যালয়ৰ পৰা মাত্ৰ কিছু আঁতৰত থকা তেতিয়াৰ ইমপেৰিয়েল বেংক আৰু বৰ্তমানৰ ভাৰতীয় ষ্টেট বেংকৰ পৰা টকা উলিয়াই জ্বলাই দিছিল ৷ ইয়াৰোপৰি মুদ্ৰাসমূহ পদুম পুখুৰীলৈ দলিয়াই পেলোৱা হৈছিল ৷ এই সকলো দৃশ্য নিজ চক্ষুৰে প্ৰত্যক্ষ কৰিছিল Youth Emergency Organisation ৰ অন্যতম সদস্য তথা তেজপুৰৰ সুযোগ্য সন্তান ঐশ্বৰ্য কাকতিয়ে ৷
আজি পুনৰ সংকটৰ আৱৰ্তত ভাৰত-চীনৰ সম্পৰ্ক ৷ শংকিত দেশবাসী কাৰণ 1962 চনৰ সেই দিন ওভতাই নিবিচাৰে ভাৰতীয়ই ৷ আজিও ইমপেৰিয়েল বেংক আৰু পদুম পুখুৰীয়ে সোঁৱৰাই তাহানিৰ অৰাজকতা ৷
লগতে পঢ়ক : শিৱসাগৰত মূল্যবৃদ্ধিৰ বিৰুদ্ধে সৰ্ব ভাৰতীয় শ্ৰম সংস্থা সমন্বয় সমিতিৰ প্ৰতিবাদী সমদল
