ৰঙাপৰা,14 মাৰ্চ: শোণিতপুৰ জিলাৰ ৰঙাপৰাত প্ৰধানমন্ত্ৰী গ্ৰাম চড়ক যোজনাৰ অধীনৰ পথ নিৰ্মাণত উত্থাপন হৈছে ব্যাপক অনিয়মৰ অভিযোগ ৷ এই অভিযোগ তুলিছে চাহ বাগিচাৰ একাংশ ৰাইজে ।
উল্লেখ্য যে, ৰঙাপৰা-উৰহীলগা গাঁও সংযোগী পথচোৱাৰ পুনৰ নিৰ্মাণৰ কাম চলি আছে । 7.81 কিল’মিটাৰ দৈৰ্ঘৰ পথচোৱা পকীকৰণৰ বাবে মুঠ 2 কোটি 77 লাখ 39 হাজাৰ 800 টকা ভাৰত চৰকাৰৰ প্ৰধানমন্ত্ৰী গ্ৰাম্য পথ উন্নয়ন আঁচনি পুঁজিৰ পৰা অনুমোদন কৰা হৈছিল ৷ এই পথচোৱাৰ ঠিকা লাভ কৰিছিল ঠিকাদাৰ মহম্মদ নুৰ উদ্দিন আহমেদ পাঠানে ।
ৰাইজৰ অভিযোগ অনুসৰি, গুৰুত্বপূৰ্ণ পথচোৱা বৰ্তমানো আঁচনি অনুসৰি নিৰ্মাণ হোৱা নাই । পথচোৱা ঠিকাদাৰে অতি নিম্নমানৰ সামগ্ৰীৰে নিৰ্মাণ কৰা বুলি আন এক অভিযোগ উত্থাপন কৰিছে তাৰাজুলি চাহ বাগিচাৰ একাংশ ৰাইজে । গতিকে পথচোৱাত সংঘটিত হোৱা অনিয়মৰ তদন্ত কৰিবলৈ বাগিচাখনৰ ৰাইজে দাবী জনাইছে বিভাগীয় কৰ্তৃপক্ষক । অন্যথা ৰাইজে গণতান্ত্ৰিক আন্দোলন গঢ়ি তোলাৰ হুংকাৰ প্ৰদান কৰে ৷
জানিব পৰা মতে, ৰঙাপৰা উচ্চতৰ মাধ্যমিক বিদ্যালয়ৰ পৰা তাৰাজুলি চাহ বাগিচা হৈ উৰহীলগা গাঁৱলৈ যোৱা পথচোৱাৰে নিতৌ কেইবাখনো শিক্ষানুষ্ঠানৰ ছাত্ৰ-ছাত্ৰীয়ে অহা-যোৱা কৰি থকাৰ উপৰিও দৈনিক শতাধিক যান-বাহন চলাচল কৰে । উক্ত পথচোৱাৰে অসম-অৰুণাচলৰ সীমান্তৱৰ্তী কেইবাখনো গাঁৱৰ ৰাইজে ৰঙাপৰা চহৰলৈ অহা-যোৱা কৰে ৷
লগতে পঢ়ক: মৰিগাঁৱত নৱ নিযুক্ত উপায়ুক্তৰ কাৰ্যভাৰ গ্ৰহণ
