ৰঙাপৰা, 5 মে': মহামাৰী ক'ৰণা ভাইৰাছে মানৱ জাতিলৈ দুৰ্যোগ কঢ়িয়াই অনাৰ সময়তে ৰাজ্যৰ কোনো কোনো অঞ্চলত বৰষুণ নোহোৱা পৰিলক্ষিত হৈছে ৷ ফলত বিভিন্ন জিলাৰ লগতে শোণিতপুৰ জিলাৰ ৰঙাপৰাৰ ফুলগুৰিৰ আমতলৰ কৃষক ৰাইজে শালি ধান খেতিৰ কঠীয়া সিঁচিব নোৱাৰি হাহাকাৰ কৰিবলগীয়া পৰিস্থিতিৰ সৃষ্টি হৈছে ।
ইফালে লাখ-লাখ টকা খৰচ কৰি কেন্দ্ৰীয় আৰু ৰাজ্য চৰকাৰে ৰূপায়ণ কৰা প্ৰধানমন্ত্ৰী কৃষি সিঞ্চন চৰকাৰী আঁচনি খন ধোঁৱাচাঙত উঠা বুলি অভিযোগ তুলিছে ৰাইজে । প্ৰধানমন্ত্ৰী কৃষি সিঞ্চন আঁচনিৰ জৰিয়তে কৃষক ৰাইজৰ বাবে পানী যোগান ব্যৱস্থা কৰা হৈছিল যদিও আজি লৈকে উক্ত আঁচনিখনৰ পৰা উপকৃত নোহোৱা বুলি এক গুৰুতৰ অভিযোগ কৰিছে । দীৰ্ঘ দিন ধৰি উক্ত আঁচনি খনত জড়িত ঠিকাদাৰে আঁচনি খনৰ কাম সম্পূৰ্ণ নকৰাত পানী লাভ কৰাৰ পৰা বঞ্চিত হৈছে বুলি অভিযোগ কৰিছে কৃষক সকলে ৷
বছৰ বছৰ ধৰি দেশৰ অৰ্থনৈতিক দিশত গুৰুত্বপূৰ্ণ ভূমিকা পালন কৰা কৃষক ৰাইজৰ সমস্যাৰাজি আজিও সমস্যা হৈ থাকিল ৷ কোনো এখন চৰকাৰেই কৃষক সকলৰ সমস্যা সমাধানত গুৰুত্ব নিদিয়াৰো আন এক অভিযোগ কৰিছে কৃষক ৰাইজে ৷ যাৰ ফলত কৃষক ৰাইজে আজিও বৰষুণৰ পানীৰ ওপৰতে ভৰষা কৰি কৃষি কাৰ্যত বৰ্তি থাকিবলগীয়া হৈছে। অতি শীঘ্ৰে কৃষক ৰাইজৰ বাবে বিহিত ব্যৱস্থা গ্ৰহণ কৰিবলৈ চৰকাৰক আহ্বান জনাইছে ৷
