চতিয়া, 2 মে' : দিল্লীত কৰ'ণাত আক্ৰান্ত অসমৰ শোণিতপুৰ জিলাৰ শলগুৰি গাঁৱৰ চিআৰপিএফ জোৱানজনক ৰাজ্যলৈ উভতাই আনি চিকিৎসা কৰিবলৈ অনুৰোধ জনাইছে পৰিয়ালৰ লোকে ৷ আনকি তেঁওৰ লগতে দিল্লীত আক্ৰান্ত সকলো জোৱানকে অসমলৈ ঘূৰাই আনি চিকিৎসা কৰিবৰ বাবে স্বাস্থ্য মন্ত্ৰীক অনুৰোধ জনাইছে চিআৰপিএফ জোৱান জনৰ মাতৃ আৰু ভাতৃয়ে ৷
জোৱান জনৰ মাতৃয়ে জনোৱা অনুসৰি, অসমৰ স্বাস্থ্য মন্ত্ৰী হিমন্ত বিশ্ব শৰ্মা আৰু চৰকাৰৰ ওপৰত গভীৰ আস্থা আছে ৷ অসমলৈ ঘূৰাই আনি চিকিৎসা কৰালে তেওঁলোক সোনকালে সুস্থ হৈ উঠিব বুলি মন্তব্য কৰে জোৱানগৰাকীৰ মাতৃয়ে ৷
আনহাতে জোৱান জনৰ ভাতৃয়ে জনোৱা অনুসৰি তেওঁলোকে তাত যথেষ্ট অসুবিধাৰ সন্মুখীন হৈছে ৷ সেয়েহে অনতিপলমে তেওঁলোকক অসমলৈ ঘূৰাই আনিব লাগে ৷ উল্লেখযোগ্য যে, বৰ্তমান জোৱান জন দিল্লীৰ ময়ুৰ বিহাৰ ফেচ থ্ৰীত আছে ৷
লগতে পঢ়ক : সাহায্য উভতাই নিদিলে জেল'লৈ প্ৰেৰণ কৰাৰ ভাবুকি পঞ্চায়ত প্ৰতিনিধিৰ
