তেজপুৰ,১৯ এপ্ৰিল: সমগ্ৰ দেশৰ লগতে অসমতো ভয়াৱহভাৱে বৃদ্ধি পাইছে মহামাৰী কৰ’ণাৰ দ্বিতীয় সংক্ৰমণ । তেজপুৰ শালনিবাৰী বিমানবন্দৰত দুজন কৰ্মচাৰী ক’ভিড -১৯ ত আক্ৰান্ত হৈছে । জানিব পৰা মতে, এজন এজিএম আৰু চিআইএছএফৰ কমাণ্ডেণ্টৰ পৰিয়াল আক্ৰান্ত হৈছে । উল্লেখ্য যে, শোণিতপুৰ জিলাত সোমবাৰে দিনৰ ১২ বজালৈ ১৪ জন লোক আক্ৰান্ত হয় আৰু মুঠ আক্ৰান্তৰ সংখ্যা হয়গৈ ১৭৫ গৰাকী । অসমস্থিত ৰাষ্ট্ৰীয় স্বাস্থ্য মিছনৰ তথ্য মতে, দেওবাৰৰ দিনলৈকে মুঠ 78,30,860 টা পৰীক্ষা সম্পন্ন হৈছে ৷ আক্ৰান্তসকলৰ ভিতৰত মৃত্যু হৈছে 1,347 গৰাকীৰ ৷ আৰোগ্য লাভ কৰিছে ২,২৬,705 গৰাকীয়ে ৷ ইয়াৰ বিপৰীতে মাত্ৰ দেওবাৰৰ দিনটোত ৬ খন জিলাত এজনকৈ লোকৰ মৃত্যু হৈছে । ইফালে সমগ্ৰ ভাৰততে ব্যাপক হাৰত নাটনি হৈছে অক্সিজেন চিলিণ্ডাৰৰ । আইচিইউত বৃদ্ধি পাইছে ৰোগীৰ সংখ্যা । দেশৰ ৰাজধানী দিল্লীত এসপ্তাহৰ বাবে লক ডাউন ঘোষণা কৰিছে ।
শোণিতপুৰ জিলাৰ সদৰ তেজপুৰত সোমবাৰে এজন ব্যক্তিৰ একক প্ৰচেষ্টাৰে সমগ্ৰ চহৰখনৰ ব্যৱসায়িক আৰু ৰাইজক সজাগ কৰিবলৈ লৈছে এক বিশেষ প্ৰচেষ্টা আৰু মুকলিকৈ মুখা অবয়ৱ বিতৰণ কৰি সকলোকে সজাগ কৰি তুলিছে । ক’ভিড ১৯ ৰ সংক্ৰমণৰ বাবে অসমৰ স্বাস্থ্য বিভাগে জিলাসমূহলৈ নিম্ন শ্ৰেণীৰ পৰা ৫ম শ্ৰেণীলৈকে বন্ধ ঘোষণা কৰিছে । জিলা উপায়ুক্তই সমগ্ৰ শোণিতপুৰ জিলাখনৰ ক’ভিড সংক্ৰমণৰ বৃদ্ধিৰ বাবে সকলো প্ৰাইমেৰী আৰু ৫ম শ্ৰেণীলৈকে বিদ্যালয় সম্পূৰ্ণৰূপে বন্ধ ৰখাৰ নিৰ্দেশ জাৰি কৰিছে ।
আনহাতে, এই সংক্ৰমণৰ বাবে তেজপুৰ কেন্দ্ৰীয় বিশ্ববিদ্যালয়ৰ কৰ্তৃপক্ষই গ্ৰহণ কৰিছে এক বিশেষ নিৰ্দেশনা । কৰ্তৃপক্ষই জাৰি কৰা এক জাননীৰ জৰিয়তে সকলো পি জি/ ইউ জি একমাত্ৰ চূড়ান্ত বৰ্ষৰ পিএইচডি ছাত্ৰ-ছাত্ৰীসকলৰ বাহিৰে সকলোকে ২৩ এপ্ৰিলৰ ভিতৰত তেওঁলোকৰ হোষ্টেলসমূহ খালী কৰিবলৈ নিৰ্দেশ জাৰি কৰিছে ৷ প্ৰতিটো কাৰ্যালয়ৰ নিজৰ কোঠাৰ চাবি কৰ্তৃপক্ষক জমা দিবলৈ আহ্বান জনাইছে । আনহাতে পি জি/ ইউ জি চূড়ান্ত বৰ্ষৰ ছাত্ৰ-ছাত্ৰী ২৯ এপ্ৰিললৈকে থাকিবলৈ অনুমতি দিয়া হৈছে আৰু গৱেষণা কৰি থকাসকলক গৱেষণা আৰু গৱেষণাগাৰ ৩০ এপ্ৰিলৰ পিছত খালী কৰিবলৈ নিৰ্দেশ জাৰি কৰিছে বিশ্ববিদ্যালয় কৰ্তৃপক্ষই ।
লগতে পঢ়ক: বাইহাটা চাৰিআলিত শিক্ষাৰ্থীৰ উত্তাল প্ৰতিবাদ
