তেজপুৰ, 28 আগষ্টঃ পুনৰ ভাৰতীয় সীমান্তত প্ৰৱেশ চীনা সৈন্যৰ ৷ অৰুণাচল প্ৰদেশৰ টাৱাং জিলাৰ টাচৌ গাঁৱৰ হলি জলপ্ৰপাতৰ য়াংকিয়ন সীমান্তৰে ভাৰতৰ ভূমিত প্ৰৱেশ কৰে চীনা সৈন্যৰ এটা দলে ৷ ভাৰতীয় সেনাৰ বৰ্ডাৰ ৰ'ডছ অৰ্গেনাজেশ্বনৰ অধীনত উক্ত স্থানত চলি থকা এক নিৰ্মাণকাৰ্যত বাধা দিবলৈ এইদৰে আন্তঃৰাষ্ট্ৰীয় সীমা অতিক্ৰম কৰি ভাৰতৰ ভূমিত প্ৰৱেশ কৰে চীনা সৈন্যৰ দলটোৱে ৷ অৱশ্যে ভাৰতীয় সেনাই খেদি পঠিয়াবলৈ সক্ষম হয় চীনা সেনাৰ দলটোক ৷
উল্লেখ্য যে, ডোকলামৰ পিচতে অৰুণাচল সীমান্তৰে ভাৰতৰ ভূমিত প্ৰৱেশৰ চেষ্টা চলাই আহিছে চীনা সৈন্যই ৷ ইয়াৰ পূৰ্বেই 2018 চনৰ ছেপ্তেম্বৰ মাহত অৰুণাচলৰ দিবাং ভেলীত কেম্প পাতি আছিল চীনা সৈন্যই ৷ অক্টোবৰ মাহত এই ঘটনা পোহৰলৈ আহিছিল ৷ চলিত বৰ্ষৰ 22 জুলাইত পুনৰ ভাৰতৰ ভূমিত প্ৰৱেশ কৰিছিল চীনা সৈন্যই ৷ টাৱাং জিলাৰ টাচৌ গাঁৱৰ হলি জলপ্ৰপাতৰ য়াংকিয়ন সীমান্তৰে ভাৰতৰ ভূমিত প্ৰৱেশ কৰিছিল চীনা সৈন্যৰ দলটোৱে ৷ কিন্তু শেহতীয়াকৈ একেটা স্থানতে পুনৰবাৰ ভাৰতৰ ভূমিত প্ৰৱেশৰ চেষ্টা চলায় ৷
শেহতীয়াকৈ মঙলবাৰে ভাৰতীয় সেনাৰ উপ-মুখ্য সেনাধ্যক্ষ মনোজ মুকুন্দ নাৰাভানে কলিকাতা এখন সংবাদমেলত ভাৰতীয় সেনাই চীনৰ আগ্ৰাসন সহ্য নকৰে বুলি কৈছিল ৷ চীনা সৈন্যই যদি 100 বাৰ প্ৰৱেশ কৰে ভাৰতীয় সেনাই 200 বাৰ প্ৰৱেশ কৰাৰ সক্ষমতা ৰাখিছে ৷ 1962 চনৰ নীতি এতিয়া আৰু নাই, ভাৰতীয় সেনাই এতিয়া বুৰঞ্জী পুনৰাবৃত্তি নকৰে, ভাৰতীয় সেনাৰ বাবে বহুতৰ বুৰঞ্জী হৈ পৰিব ৷
