তেজপুৰ, ২১ নৱেম্বৰ : ‘‘১৯৬২ চনত যদি ভাৰতৰ শক্তিশালী নেতৃত্ব থাকিল হয়, তেন্তে চীন-ভাৰত (China-India War) যুদ্ধত চীনৰ বিৰুদ্ধে ভাৰতে কোনো বিপৰীত পৰিস্থিতিৰ সন্মুখীন হ'বলগা নহ'লহেতেন । কাৰণ এতিয়া পৰিস্থিতি আৰু সমীকৰণবোৰ সলনি হৈছে । ভাৰত হৈছে বিশ্বৰ অন্যতম শক্তিশালী সশস্ত্ৰ বাহিনীৰ (Armed forces) দেশ । কিন্তু আমি আমাৰ ৰক্ষকসকলক হেয় কৰা উচিত নহয় ।’’ এই মন্তব্য অৰুণাচল প্ৰদেশৰ ৰাজ্যপাল ব্ৰিগেডিয়াৰ (অৱসৰপ্ৰাপ্ত) বি.ডি. মিশ্ৰৰ (Brig (Retd) B D Mishra) ।
অৰুণাচল প্ৰদেশৰ চাংলাং জিলাৰ মিয়াওত ৰাজপুত ৰেজিমেণ্টৰ ১৪তম বেটেলিয়নৰ কোম্পানী অপাৰেশ্যনেল বেছত এক সৈনিক সন্মিলনত অংশগ্ৰহণ কৰি তেওঁ এই মন্তব্য কৰে । তেওঁ লগতে কয় যে প্ৰতিজন সৈন্যই আমাৰ সীমান্তত যিকোনো পৰিস্থিতিৰ বাবে নিজকে প্ৰস্তুত কৰিব লাগিব । ৰাজ্যপালগৰাকীয়ে কয় যে ভাৰতৰ প্ৰধানমন্ত্ৰী নৰেন্দ্ৰ মোডীৰ (Narendra Modi) নেতৃত্বত কেন্দ্ৰীয় চৰকাৰে সেনা বাহিনীৰ বাবে যথেষ্ট কাম কৰি আছে । নিৰাপত্তা বাহিনীৰ (Security forces) প্ৰতি চৰকাৰৰ মনোভাৱত এক আমূল পৰিৱৰ্তন আহিছে ।
এতিয়া দেশৰ শীৰ্ষ ৰাজনৈতিক নেতৃত্ব সুৰক্ষা কৰ্মীসকলৰ কল্যাণৰ বিষয়ে যথেষ্ট চিন্তিত বুলিও ৰাজ্যপালগৰাকীয়ে উল্লেখ কৰে । ১৯৬৫ চনত কোম্পানী কামাণ্ডাৰ হিচাপে ১৪ ৰাজপুতৰ সৈতে ভাৰত-পাক যুদ্ধত অংশগ্ৰহণ কৰা বেটেলিয়ন আৰু ইয়াৰ সৈনিকসকলৰ সাহস আৰু দক্ষতাৰ প্ৰশংসাও কৰে ৰাজ্যপাল মিশ্ৰই ।
ৰাজ্যপালগৰাকীয়ে বিষয়া আৰু জোৱানসকলক অনুশাসন বজাই ৰাখিবলৈ, শাৰীৰিক সুস্থতা আৰু ক্ষেত্ৰ শিল্পৰ বাবে নিজকে কঠোৰ প্ৰশিক্ষণ দিবলৈ আৰু তেওঁলোকক নিযুক্তি দিয়া অঞ্চলৰ অসামৰিক জনসাধাৰণৰ সৈতে সুসম্পৰ্ক গঢ়ি তুলিবলৈ পৰামৰ্শ দিয়ে । তেওঁ লগতে কয় যে যদি তেওঁলোক দৃঢ় প্ৰতিজ্ঞ হয় তেন্তে তেওঁলোকে তেওঁলোকৰ সকলো প্ৰচেষ্টাত সফল হ'ব পাৰিব । উল্লেখ্য যে অনুষ্ঠানত কামাণ্ডিং অফিচাৰ কৰ্ণেল বিবেক আনন্দে ৰাজ্যপালক তেওঁৰ ভূমিকা, দায়িত্বৰ ক্ষেত্ৰ আৰু ইউনিটৰ অভিযানৰ বিষয়ে অৱগত কৰে ।
লগতে পঢ়ক :Project Sadbhavana : জনতা ভৱনত ব্যাপক তৎপৰতা
