শোণিতপুৰ-ধুবুৰী, 26 আগষ্ট: বহু প্ৰতীক্ষিত ৰাষ্ট্ৰীয় নাগৰিকপঞ্জীৰ চূড়ান্ত খচৰা প্ৰকাশ পাবলৈ মাজত মাথো চাৰিটা দিন ৷ চৰকাৰৰ লগতে খচৰা প্ৰকাশৰ পিছত উদ্ভৱ হ'ব পৰা যিকোনো পৰিস্থিতিৰে মোকাবিলা কৰিবলৈ এতিয়া সাজু হৈছে অসম আৰক্ষীৰ লগতে জিলা প্ৰশাসন ৷ ৰাজ্য দুই স্পৰ্শকাতৰ জিলা ধুবুৰী আৰু শোণিতপুৰৰ প্ৰশাসনে নাগৰিক পঞ্জীৰ চূড়ান্ত খছৰা প্ৰকাশক লৈ বিশেষ তৎপৰতা গ্ৰহণ কৰিছে ৷ আজি ৰাষ্ট্ৰীয় নাগৰিকপঞ্জীৰ চুড়ান্ত খচৰাত কোনো ব্যক্তিৰ নাম প্ৰকাশ নাপালে তেওঁ নিজকে বিদেশী বুলি গণ্য কৰিব নালাগে বুলি সংবাদিকৰ আগত মন্তব্য কৰে উপায়ুক্ত নৰসিং পৱাৰে ৷ নাগৰিকক পুনৰ আবেদন কৰাৰ সুযোগ লাভ কৰিব বুলিও তেও জানিবলৈ দিয়ে ৷ উল্লেখযোগ্য যে ৰাজ্যৰ অন্যান্য প্ৰান্তৰ লগতে শোণিতপুৰ জিলাৰ মুঠ ৯৮ টা NRC কেন্দ্ৰত দিনে নিশাই পূৰ্ণ গতিত চলি আছে নাগৰিক পঞ্জীৰ চূড়ান্ত খছৰা প্ৰকাশৰ কাম ৷
আনহাতে ধুবুৰী জিলাতো এন আৰ চিৰ চূড়ান্ত তালিকা প্ৰকাশৰ পূৰ্বে আইন শৃংখলাকে ধৰি সকলো দিশতে এতিয়া চোকা দৃষ্টি ৰাখিছে জিলা প্ৰশাসনে ৷ সোমবাৰে উপায়ুক্তৰ কাৰ্যালয়ৰ সভাকক্ষত উপায়ুক্ত অনন্তলাল জ্ঞানী আৰু জিলা আৰক্ষী অধীক্ষক যুৱৰাজ সিংৰ উপস্থিতিত উচ্চ পৰ্যায়ৰ বিষয়া সকলৰ মাজত এক গুৰুত্বপূৰ্ণ বৈঠক অনুষ্ঠিত হয় য'ত সেনা আৰু চি আৰ পি এফ বিষয়াও উপস্থিত থাকে ৷ জিলাখনৰ মুঠ 136 টা এন আৰ চি কেন্দ্ৰত নিৰাপত্তা ব্যৱস্থা ইতিমধ্যে শক্তিশালী কৰি তোলা হৈছে ৷ ভাৰত বাংলা সীমান্তৱৰ্তী জিলাখনত যাতে কেনোধৰণৰ অপ্ৰীতিকৰ ঘটনা সংঘটিত নহয় তাৰবাবে কটকটীয়া নিৰাপত্তা বেষ্টনী গঢ়ি তোলা হৈছে ৷
ইফালে ছ'চিয়েল মিডিয়াতো চোকা দৃষ্টি ৰাখিছে দুয়োখন জিলাৰ আৰক্ষী-প্ৰশাসনে ৷ কোনো লোকে ছ'চিয়েল মেডিয়া যোগে কোনো ধৰণৰ সাম্প্ৰদায়িক তথা প্ৰৰোচনা মন্তব্য কৰিলে তেনে লোকৰ ওপৰত আইনী ব্যৱস্থা ল'ব জিলা প্ৰশাসনে ৷ অহা ৩১ আগষ্টৰ পুৱাৰ ভাগত ৰাষ্ট্ৰীয় নাগৰিক পঞ্জীৰ চূড়ান্ত তালিকা প্ৰকাশ পোৱাৰ সম্ভাৱনা আছে ৷
