নাজিৰা, ২ অক্টোবৰঃ বোৱাৰী নিৰ্যাতন ঘটনাৰ লগত জড়িত তিনি অভিযুক্তক আটক ৷ ডিমৌ ৰজাবাৰীৰ কৈবৰ্তদলনিৰ নিজ গৃহৰ পৰা নাজিৰা আৰক্ষীয়ে আটক কৰে তিনি অভিযুক্তক ৷
উল্লেখ্য যে, তিনিমাহ পূৰ্বে বিবাহ পাশত আৱদ্ধ হোৱা এগৰাকী ন-বোৱাৰীক শাৰীৰিক অত্যাচাৰ চলাই এতিয়া ৰঙাঘৰৰ আলহী হ'ল তিনি ককাই-ভাই ৷ নাজিৰা বাউলীমৈদামৰ পৰা ডিমৌ ৰজাবাৰী কৈৱৰ্তদলনিলৈ বিয়া হৈছিল এগৰাকী যুৱতী । কিন্তু ন-কইনাৰ গাৰ পৰা মাহ হালধীৰ গোন্ধ নাযাওঁতেই স্বামীৰ লগতে বৰজনাক আৰু দেওৰেকৰ নাৰকীয় অত্যাচাৰৰ বলি হোৱাৰ অভিযোগ যুৱতী গৰাকীৰ ৷ স্বামী ৰিতু গগৈৰ লগত বিবাহ পাশত আৱদ্ধ হোৱা পাচৰে পৰা যুৱতী গৰাকীক বৰজনাক আৰু দেওৰেকে অমানুষিক অত্যাচাৰ চলোৱাৰ অভিযোগ ৷ স্বামী ঘৰত নথকাৰ সুযোগ লৈ বৰজনাক শৈলেন গগৈয়ে যৌন নিৰ্যাতন চলোৱাৰো অভিযোগ উত্থাপন কৰে যুৱতীগৰাকীয়ে ৷ তাৰোপৰি দেওৰেক তীৰ্থ গগৈয়েও শাৰীৰিক সম্পৰ্কৰ প্ৰস্তাৱ দিছিল বুলি অভিযোগ উত্থাপন কৰিছে ভুক্তভোগী যুৱতীগৰাকীয়ে ৷
বৰজনাক শৈলেন গগৈ আৰু দেওৰক তীৰ্থ গগৈৰ লগত শাৰীৰিক সম্পৰ্ক কৰিবলৈ অমান্তি হোৱাৰ বাবেই বৰজনাক আৰু দেওৰেকে মিলি মৰিয়াই মৰিয়াই হত্যাৰ চেষ্টা চলাই বুলি মন্তব্য কৰে যুৱতী গৰাকীয়ে ৷ ইমানেই নহয়, দেওবাৰে নিশা শাৰীৰিক অত্যাচাৰ সহিব নোৱাৰি স্বামী গৃহৰ পৰা পলাই অহাৰ পাচত পুনৰ ওভতাই নি মাৰপিট কৰে যুৱতী গৰাকীক ৷ যাৰ বাবে চকু আৰু মুখমণ্ডলত গুৰুতৰভাৱে আঘাট পোৱা যুৱতী গৰাকীয়ে বৰ্তমান জীৱন মৃত্যুৰে যুজি আছে ডিব্ৰুগড়স্থিত অসম চিকিৎসা মহাবিদ্যালয়ত ৷ ইতিমধ্যে যুৱতীগৰাকীৰ পৰিয়ালৰ এজাহাৰৰ ভিত্তিতে তিনি অভিযুক্ত ক্ৰমে স্বামী ৰিতু গগৈ, বৰজনাক শৈলেন গগৈয়ে আৰু দেওৰেক তীৰ্থ গগৈক নাজিৰা আৰক্ষীয়ে আটক কৰি ন্যায়িক জিম্মালৈ প্ৰেৰণ কৰিছে ৷
