শিৱসাগৰ,14 ডিচেম্বৰ: শিৱসাগৰত আৰম্ভ কৰা হৈছে টিটেনাছ আৰু ডিপথেৰিয়াৰ বিশেষ প্ৰতিষেধক অভিযান ৷ এখন টিটেনাছ-ডিপথেৰিয়া মুক্ত জিলাৰ লক্ষ্যৰে সোমবাৰৰ শিৱসাগৰ জিলা যুটীয়া স্বাস্থ্য সঞ্চালকৰ কাৰ্যালয়ত এই অভিযানৰ শুভাৰম্ভ কৰে শিৱসাগৰ জিলাৰ উপায়ুক্ত বিষ্ণু কমল বৰাই৷ জিলাখনৰ বিভিন্ন স্বাস্থ্য বিষয়া,স্বাস্থ্য কৰ্মী আৰু আশা কৰ্মীৰ উপস্থিতত নিৰ্ধাৰিত পৰিকল্পনা অনুসৰি এই প্ৰতিষেধক নিৰ্দিষ্ট বয়সৰ শিশু সকলক প্ৰদান কৰা হব বুলি প্ৰকাশ কৰিছে স্বাস্থ্য বিভাগে ৷
উল্লেখ্য যে, সন্তান জন্মৰ পাছত বিভিন্ন সময়ত টিটেনাছ-ডিপথেৰিয়াৰ প্ৰতিষেধক প্ৰদান কৰি অহা হৈছে যদিও এই প্ৰতিষেধক সমূহ পৰ্যাপ্ত নোহোৱা যেন পৰিলক্ষিত হৈছে ৷ সেয়েহে অসম চৰকাৰৰ স্বাস্থ্য বিভাগে সমগ্ৰ অসমতে 5-6 বছৰৰ আৰু 10-11 বছৰৰ শিশু সকলক এই প্ৰতিষেধক প্ৰদানৰ বাবে 21 দিনীয়া এক অভিযান সোমবাৰৰ পৰা আৰম্ভ কৰিছে ৷ চৰকাৰে নিৰ্ধাৰণ কৰা নিৰ্দিষ্ট বয়সৰ শিশু সকলৰ অভিভাৱক সকলক এই প্ৰতিষেধক নিজ নিজ সন্তানক প্ৰদান কৰিবলৈ আহ্বান জনাইছে শিৱসাগৰ জিলা স্বাস্থ্য বিভাগে ৷
