শিৱসাগৰ, 30 এপ্ৰিল: সম্পন্ন হৈ যোৱা অসম বিধান সভা নিৰ্বাচনৰ ভোট গণনালৈ মাজত মাত্ৰ এটা দিন । নিৰ্বাচন আয়োগৰ পৃষ্ঠপোষকতাত জিলাখনৰ শিৱসাগৰ, আমগুৰি আৰু থাওৰা সমষ্টিৰ ভোটগণনাৰ বাবে ইতিমধ্যে সম্পূৰ্ণ সাজু হৈ উঠিছে শিৱসাগৰ জিলা প্ৰাশাসন ৷
প্ৰায় এমাহ দিন শিৱসাগৰ চৰকাৰী উচ্চতৰ মাধ্যমিক বিদ্যালয়ত ষ্ট্ৰংৰুম স্থাপন কৰি ইভিএম সমূহ সুৰক্ষিত কৰি ৰখা হৈছে । ২ মে' তাৰিখে এই বিদ্যালয়তে সম্পন্ন হব তিনি সমষ্টিৰ ভোটগণনা । ইয়াৰ বাবে কৰিবলগীয়া সকলো প্ৰস্তুতি প্ৰায় সম্পন্ন কৰিছে শিৱসাগৰ জিলা প্ৰশাসনে ।
আনহাতে এইবাৰ নিৰ্বাচন আয়োগে ভোটগণনা কেন্দ্ৰৰ ভিতৰত প্ৰৱেশ কৰা আৰু ভোটগণনাত অংশগ্ৰহণ কৰা সকলো লোকৰে ৪৮ ঘণ্টাৰ আগত ক’ভিড পৰীক্ষা বাধ্যতামূলক কৰা হৈছে । যাৰবাবে শিৱসাগৰৰ বৰ্ডিং খেলপথাৰত ক’ভিড পৰীক্ষা কেন্দ্ৰ স্থাপন কৰি ভোট গণনাত অংশ লোৱা বিষয়া-কৰ্মচাৰী,সুৰক্ষা কৰ্মী, সাংবাদিক, প্ৰাৰ্থীৰ এজেণ্ট আদি সকলোৱে ক’ভিড পৰীক্ষা সম্পন্ন কৰিছে ।
ক’ভিড নিগেটিভ প্ৰমাণপত্ৰ প্ৰদৰ্শন নকৰিলে ভোটগণনা কেন্দ্ৰত প্ৰৱেশ নিষিদ্ধ কৰিছে নিৰ্বাচন আয়োগে । ক’ভিড ৰোগৰ সংক্ৰমণ ৰোধৰ বাবে আয়োগে এই ব্যৱস্থা হাতত লৈছে ।
লগতে পঢ়ক : 2021 ৰ বিধানসভা নিৰ্বাচন: দক্ষিণ নিশ্চিত, পূবত এতিয়াও অনিশ্চয়তা
