শিৱসাগৰ, 23 মে’: আজিৰে পৰা ৰাজ্যত আৰম্ভ হৈছে দ্বিতীয় পৰ্যায়ৰ গুণোৎসৱ (Second phase of Gunotsav begins in Assam from today) ৷ আগন্তুক 26 মে’লৈকে চলিব লগা এই গুণোৎসৱত ৰাজ্যৰ 46000 বিদ্যালয়ৰ 42,50,224 গৰাকী ছাত্ৰ-ছাত্ৰীক মূল্যায়ণ কৰিব 18,910 গৰাকী বহিঃ মূল্যায়কে ।
শিৱসাগৰ জিলাকে ধৰি কামৰূপ, কোকৰাঝাৰ, গোলাঘাট, তিনিচুকীয়া, বৰপেটা, মাজুলী, মৰিগাঁও আৰু ওদালগুৰি জিলাত আজিৰ পৰা আৰম্ভ হৈছে দ্বিতীয় পৰ্যায়ৰ গুণোৎসৱ । এই দ্বিতীয় পৰ্যায়ৰ গুণোৎসৱত শিৱসাগৰ জিলাৰ 1327 খন বিদ্যালয়ৰ 72,655 গৰাকী ছাত্ৰ-ছাত্ৰীয়ে এই গুণোৎসৱত অংশগ্ৰহণ কৰিছে (Gunotsav Assam 2022) ।
ৰাজ্যৰ প্ৰাথমিক, মাধ্যমিক চৰকাৰী বিদ্যালয়ৰ লগতে চাহ বাগান কৰ্তৃপক্ষৰ দ্বাৰা পৰিচালিত বিদ্যালয় সমূহৰ প্ৰথম শ্ৰেণীৰ পৰা নৱম শ্ৰেণীৰ ছাত্ৰ-ছাত্ৰী সকলৰ শৈক্ষিক প্ৰগতি নিশ্চিত কৰা এই গুণোৎসৱৰ মূল উদ্দেশ্য ৷ এই উদ্দেশ্য আগত ৰাখি বহিঃ মূল্যায়কসকলে বিদ্যালয়ৰ পাৰপাৰ্শ্বিক দিশ সমূহৰ লগতে ছাত্ৰ-ছাত্ৰীৰ শৈক্ষিক প্ৰগতিৰ বুজ লয় ।
ইয়াৰ বাবে মূল্যায়কসকলক বিশেষ কেতবোৰ দিশত গুৰুত্ব দিবৰ বাবে ইতিমধ্যে কেতবোৰ প্ৰশিক্ষণ প্ৰদান কৰা হৈছিল । ইয়াৰ ভিত্তিত মূল্যায়কসকলে বিভিন্ন দিশ পৰীক্ষা কৰি বিদ্যালয়ৰ ছাত্ৰ-ছাত্ৰীৰ শৈক্ষিক প্ৰগতিৰ লগতে বিদ্যালয়ৰ পাৰপাৰ্শ্বিকৰ লগতে পৰিকাঠামোৰ ওপৰত মূল্যায়ণ কৰিব ।
এই গুণোৎসৱ উপলক্ষে শিৱসাগৰ নগৰৰ লক্ষ্মীনাথ বেজবৰুৱা শিশু ভৱন,১ নং টাউন প্ৰাইমেৰী বিদ্যালয়,৩ নং প্ৰাথমিক বিদ্যালয় আদি বিদ্যালয়ত এক উৎসৱমুখৰ পৰিৱেশ পৰিলক্ষিত হয় । ছাত্ৰ-ছাত্ৰী সকলে গুণোৎসৱ উপলক্ষে শৈক্ষিক পাঠ্যক্ৰমৰ লগতে আনুষাংগিক বিষয়সমূহ প্ৰদৰ্শন কৰে ।
লগতে পঢ়ক : নলবাৰীৰ বান পৰিস্থিতি পৰ্যবেক্ষণ মন্ত্ৰী চন্দ্ৰ মোহন পাটোৱাৰীৰ
