শিৱসাগৰ, 6 অক্টোবৰঃ ৰাজ্যৰ সমূহ ৰাইজৰ মনত মহা অষ্টমীৰ উছাহ ৷ ৰাজ্যৰ সকলো মণ্ডপতে হাতে হাতে হাঁহ, ছাগলী নৈবেদ্য লৈ দুৰ্গা পূজাৰ সকলোতকৈ পৱিত্ৰতম ক্ষণৰ সাক্ষী হ'বৰ বাবে যোৱা ৰাইজৰ দীঘলীয়া শাৰী ৷ শিৱসাগৰৰ ঐতিহাসিক দেৱী দৌলতো ভক্তৰ লানি নিছিগা শাৰী ৷ ১৭৩৩ খ্ৰীষ্টাব্দত আহোম স্বৰ্গদেউ শিৱসিংহৰ দিনত বৰৰজা অম্বিকাই নিৰ্মাণ কৰোৱা প্ৰায় ৩০০ বছৰীয়া ইতিহাসৰ সাক্ষী এই দৌলটোৰ প্ৰতি ভক্তসকলৰ এক অগাধ বিশ্বাস আছে ৷ এক জাগ্ৰত দৌল বুলি ৰাইজে বিশ্বাস কৰা এই দৌলটোত প্ৰত্যক বছৰেই মহা অষ্টমীৰ দিনা ভিৰ কৰেহি ৰাজ্যৰ বিভিন্ন প্ৰান্তৰ লোকে ৷ পুৰণি দিনত এই দৌলত ম'হ বলিও দিয়া হৈছিল যদিও এতিয়া সেই পৰম্পৰা বন্ধ হৈছে ৷ দেৱী দৌলৰ দুৰ্গা পূজাৰ আন এক বিশেষত্ব হ'ল এই দৌল স্থাপন হোৱা কালত পূজাৰ সময়ত এক মুছলমান পৰিয়ালে ঢাক বজাইছিল ৷ তেতিয়াৰ পৰা শিৱসাগৰৰ মুছলমান দৌল্লা পৰিয়ালক পূজাৰ সময়ত বলিৰ নৈবেদ্য প্ৰদান কৰাৰ এক পৰম্পৰা আছে । এইবাৰো প্ৰদান কৰা হ'ব এই নৈবেদ্য ৰূপে এক বলিৰ ছাগলী ৷
লগতে পঢ়কঃমানৱ সভ্যতাৰ বিকাশৰ পৰিক্ৰমা চাবলৈ কোনখন পূজালৈ যাব ?
