নাজিৰা,২৮ আগষ্টঃ শিৱসাগৰৰ নাজিৰাৰ অসম নাগালেণ্ড সীমান্তৱৰ্তী গেলেকীত পুনৰ নগাৰ সন্ত্ৰাস ৷ ক্ষুদ্ৰ চাহ খেতিয়কে ৰোপণ কৰা বহু কেইবিঘা মাটিৰ চাহ গছ কাটি তহিলং কৰিলে নগাই ৷ ঘটনাক কেন্দ্ৰ কৰি সীমান্তৱৰ্তী অঞ্চলত সৃষ্টি হৈছে উত্তেজনা ৷ উল্লেখ্য যে,বিগত দুদিন পূৰ্বে সীমান্তৱৰ্তী গেলেকীৰ শিঙিবিলত নগা লোকে অসমৰ মাটিত উপদ্ৰৱ চলাই নিৰ্মীয়মাণ অৱস্থাত থকা শ্মশান গৃহ এটা ভাঙি থৈ যায় ৷ ইয়াৰ পাচত পুনৰ মঙলবাৰে নিশা একাংশ নগা দুস্কৃতিকাৰীয়ে ক্ষুদ্ৰ চাহ খেতিয়কে ৰোপণ কৰা বাগিছাৰ চাহগছ কাটি তহিলং কৰে ৷ ইয়াৰ পূৰ্বেও বহু বাৰ নাগালেণ্ডৰ লোক আহি চাহ গছ কাটি সন্ত্ৰাস সৃষ্টি কৰিছিল ৷ কিন্তু বহুদিন ধৰি এনে কৰ্মৰ পৰা বিৰত আছিল যদিও যোৱা দুদিনত সীমান্ত অঞ্চলত নগাই যি সন্ত্ৰাস চলালে ইয়াকে লৈ এতিয়া ব্যপক প্ৰতিক্ৰিয়াৰ সৃষ্টি হৈছে সীমান্তৱৰ্তী গেলেকীত ৷
নাজিৰাৰ গেলেকীত নগাৰ সন্ত্ৰাস
