আমগুৰি, 1 অক্টোবৰ : আমগুৰিত লোকনিৰ্মাণ বিভাগ(PWD Department)ৰ পথ মেৰামতিত ব্যাপক অনিয়মৰ বাতৰি প্ৰকাশৰ পাচতে বৃহস্পতিবাৰে ঐতিহাসিক ধোদৰ আলি(Dhodar Ali) পথ পৰিদৰ্শন কৰে বিধায়ক প্ৰদীপ হাজৰিকা(Pradip Hazarika)ই ৷ ঐতিহাসিক ধোদৰ আলি পথ নিৰ্মাণত ঠিকাদাৰৰ বিৰুদ্ধে ব্যাপক অনিয়ম সংঘটিত হোৱাৰ অভিযোগ উত্থাপন হৈ আহিছিল ৷
বিধায়ক প্ৰদীপ হাজৰিকাই আমগুৰি লোকনিৰ্মাণ বিভাগৰ বিষয়াৰ সৈতে ধোদৰ আলি পথ পৰিদৰ্শন কৰি পথচোৱা সঠিকভাৱে নিৰ্মাণ কৰিবলৈ বিভাগীয় বিষয়াক নিৰ্দেশ প্ৰদান কৰে ৷ উল্লেখ্য যে, প্ৰায় 8 কোটি টকা ব্যয়েৰে নিৰ্মাণ কৰি থকা পথটোৰ বখলা-বখলে ব্লেক টেপিং এৰিবলৈ আৰম্ভ কৰিছে ৷ আমগুৰি জাঁজী দলঙৰ পৰা চামগুৰিলৈকে মেৰামতি কৰি থকা এই পথটোৰ ব্লেক টেপিং এৰি যোৱাত ইতিমধ্যে বহুকেইটা দুৰ্ঘটনাও সংঘটিত হৈছে ৷
ঠিকাদাৰে অতি নিম্নমানদণ্ডৰ সঁজুলিৰে পথ নিৰ্মাণ কৰাৰ পাচতো আমগুৰি লোকনিৰ্মাণ বিভাগৰ কাৰ্যবাহী অভিযন্তাই কোনোধৰণৰ পদক্ষেপ গ্ৰহণ নকৰাৰ অভিযোগ উত্থাপন হৈছিল ৷ ইয়াৰ পাচতে ক্ষোভিত হৈ পৰিছিল স্থানীয় সচেতন লোকসকলৰ লগতে স্থানীয় দল-সংগঠন ৷ বিধায়ক হাজৰিকাৰ নিৰ্দেশমৰ্মে পথটো মেৰামতিত ঠিকাদাৰে পুনৰ গাফিলতি নকৰাৰ আশা কৰিছে স্থানীয় ৰাইজে ৷
লগতে পঢ়ক : ৰঙিয়াত শতাধিক বঞ্চিত শিল্পীৰ অভিনৱ প্ৰতিবাদ
