গুৱাহাটী,27ছেপ্টেম্বৰঃ লামডিং ডিভিজনৰ হাওৰাপুৰ লামছাখঙৰ মাজত বৰষুণৰ ফলত হোৱা ভূমিস্খলনত ৰে'ল পথত যথেষ্ট ক্ষতিগ্ৰস্ত হৈছে । যাৰ বাবে উত্তৰ-পূৱ সীমান্ত ৰে'লৱে বাতিল কৰিছে আঠখনকৈ লোকেল যাত্ৰীবাহী ৰে'ল । শুকুৰবাৰে নিশা গুৱাহাটীৰ পৰা ৰাওনা হ'বলগীয়া গুৱাহাটী-লিডু ইন্টাৰচিটি এক্সপ্ৰেছৰ উপৰিও লিডু-গুৱাহাটী ইন্টাৰচিটি এক্সপ্ৰেছ বাতিল কৰা হৈছে । আনহাতে ২৮ ছেপ্টেম্বৰত ৰাওনা হ'বলগীয়া গুৱাহাটী-মৰিয়নী ইন্টাৰচিটি এক্সপ্ৰেছ, মৰিয়নী-গুৱাহাটী ইন্টাৰচিটি একপ্ৰেছ, ৰঙিয়া-নিউ তিনিচুকীয়া এক্সপ্ৰেছ, নিউ তিনিচুকীয়া-ৰঙিয়া এক্সপ্ৰেছ, অলিপুৰদুৱাৰ-লামডিং ইন্টাৰচিটি এক্সপ্ৰেছ, গুৱাহাটী-লামডিং পেচেঞ্জাৰ আৰু বহু কেইখন ৰে'ল বাতিল কৰা হৈছে । এই ভূমিস্খলনৰ ফলত স্থানীয় ৰে'ল বাতিল কৰা হৈছে যদিও বহুকেইখন দূৰণিবটীয়া যাত্ৰীবাহী ৰে'লৰ চলাচলত কোনো সালসলনি হোৱা নাই বুলি জনাই উত্তৰ-পূৱ সীমান্ত ৰে'লৱেৰ জনসম্পৰ্কৰক্ষী বিষয়া নৃপেন ভট্টাচাৰ্যই ।
ইপিনে হঠাতে বাতিল হোৱা লিডু-গুৱাহাটী অভিমুখী ইন্টাৰচিটি ট্ৰেইন বাতিল কৰাক লৈ হাহাকাৰ লাগিছে যাত্ৰীসকলৰ মাজত । উল্লেখ্য যে লিডু ৰে'লৱে ষ্টেচনৰ পৰা যাত্ৰা আৰম্ভ কৰি মাৰ্ঘেৰিটা ৰে'ল ষ্টেচনত থমকি ৰয় ট্ৰেইনখন ।
