শিৱসাগৰ,19 মাৰ্চঃ ৰাষ্ট্ৰীয় তদন্তকাৰী সংস্থা চমুকৈ নিয়াৰ গোচৰৰ পৰা জামিন লাভ কৰিলেও পুনৰ ৰাষ্ট্ৰদ্ৰোহৰ গোচৰত গ্ৰেপ্তাৰ হ’ল কৃষক নেতা অখিল গগৈ ৷ ডিচেম্বৰ মাহত নাগৰিকত্ব সংশোধনী আইন বিৰোধী আন্দোলনত শিৱসাগৰত উপস্থিত হৈ অখিল গগৈয়ে এক বৃহৎ জন আন্দোলনৰ সূচনা কৰিছিল । সেই বিষয়ক কেন্দ্ৰ কৰি শিৱসাগৰ আৰক্ষীয়ে নিজাববীয়াকৈ এক গোচৰ ৰুজু কৰিছিল শিৱসাগৰ সদৰ থানাত। থানাত ৰুজু হোৱা ১৩৪৪/১৯ নম্বৰৰ গোচৰৰ ভিত্তিত মঙলবাৰে শিৱসাগৰৰ আদালতে অখিল গগৈক গ্ৰেপ্তাৰ কৰাৰ আদেশ দিয়াৰ লগতে চাৰি দিনৰ ন্যায়িক জিম্মা মঞ্জুৰ কৰিছিল । সেইসূত্ৰে বৃহস্পতিবাৰে পুৱা অখিল গগৈক শিৱসাগৰ আৰক্ষীয়ে গুৱাহাটীৰ কাৰাগাৰৰ পৰা আনি শিৱসাগৰত উপস্থিত হয় ।
উল্লেখযোগ্য যে নিয়া গোচৰৰ পৰা জামিন লাভ কৰাৰ পাছতে অখিলক গ্ৰেপ্তাৰ কৰে শিৱসাগৰ আৰক্ষীয়ে । অখিল গগৈক সদৰ থানালৈ অনাৰ সময়ত থানাৰ বাহিৰত তীব্ৰ প্ৰতিবাদ সাব্যস্ত কৰে কৃষক মুক্তিৰ সদস্যই । অখিলক চক্ৰান্তমূলকভাৱে গ্ৰেপ্তাৰ কৰা বুলি চৰকাৰৰ ওপৰত অভিযোগ কৰিছে কৃষক মুক্তি সংগ্ৰাম সমিতিয়ে ।
লগতে পঢ়কঃ অখিল গগৈক পুনৰ গ্ৰেপ্তাৰ কৰাটো চৰকাৰৰ প্ৰতিশোধমূলক ব্যৱস্থাঃমোলান লস্কৰ
