শিৱসাগৰ, 4 জুন: শিৱসাগৰ জিলাৰ জয়সাগৰ আৰক্ষীৰ অভিযানত চাৰিটাকৈ বৰকাছ উদ্ধাৰ ৷ জয়সাগৰ আৰক্ষী চকীৰ ভাৰপ্ৰাপ্ত বিষয়া জ্যোতিস্মান ফুকনৰ নেতৃত্বত শুকুৰবাৰে সন্ধিয়া শিলা সাঁকো অঞ্চলত চলোৱা অভিযানটোত এটা চোৰাং ব্যৱসায়ীৰ জিম্মাৰ পৰা ৪ টাকৈ বিৰল প্ৰজাতিৰ প্ৰকাণ্ড বৰকাছ উদ্ধাৰ কৰাৰ ঘটনাই ব্যাপক চাঞ্চল্যৰ সৃষ্টি কৰিছে ৷
ভটীয়াপাৰ শিলা সাঁকোৰ নিৱাসী খগেন দাস নামৰ ব্যক্তিজনৰ গৃহত এক গোপন সূত্ৰৰ পম খেদি চলোৱা অভিযানত আৰক্ষীয়ে বৃহৎ আকাৰৰ কেৰাহীত জীয়াই থোৱা অৱস্থাত বৰকাছ কেইটা উদ্ধাৰ কৰিবলৈ সক্ষম হয় ৷ অভিযানকাৰী আৰক্ষীৰ দলটোৱে বৰকাছ সৰবৰাহ তথা মজুত ৰখাৰ অভিযোগত বাবু দাস নামৰ এজন যুৱকক আটক কৰিবলৈ সক্ষম হয় ৷
ইতিমধ্যে জয়সাগৰ আৰক্ষী চকীত ৰখা কাছ কেইটাৰ ভিতৰত এটাৰ ওজন প্ৰায় ১২ কেজি, এটাৰ ওজন ৯ কেজি আৰু দুটাৰ ওজন প্ৰায় ৬ কেজি ৷ বিগত কেইবাদিনো ধৰি এনে প্ৰক্ৰিয়াৰে বিলুপ্তপ্ৰায় বৰকাছ ধৰি গোপনে ৰমৰমীয়া বেহা চলাই অহাৰ সন্দৰ্ভত তথ্য লাভ কৰিয়েই আৰক্ষীয়ে চলাইছিল উক্ত অভিযান ৷
