শিৱসাগৰ,28এপ্ৰিল: অসম-নাগালেণ্ড সীমান্তৱৰ্তী হালোৱাটিংত নিশা সেনা-আৰক্ষীৰ অভিযান । অভিযানকালত গেলেকী-হালোৱাটিং পথত জব্দ এটা হেণ্ড গ্ৰেণেড, এখন খুকুৰী, ৱায়াৰ, নগদ ৫২,৯৫২ টকা, চেলু'টেপ ৪টা আৰু মানিবেগ ৷ শনিবাৰে চন্টক সেনা আৰু হালোৱাটিং আৰক্ষীৰ এই যুটীয়া অভিযানত দুজন নগা লোকক গ্ৰেপ্তাৰ কৰাৰ লগতে AS 04 M 0023 নম্বৰৰ এখন ছাফাৰী গাড়ী জব্দ কৰে । গ্ৰেপ্তাৰ হোৱা নগা যুৱক দুজন ক্ৰমে এইচ টিনাউ ফ'ম আৰু এইচ ভি আয়ং ফ'ম । দুয়োজন যুৱক 13 IRBN বাহিনীত কৰ্মৰত আছিল ।
উল্লেখ্য যে গেলেকীৰ পৰা হালোৱাটিং হৈ নাগালেণ্ডলৈ যোৱাৰ সময়তে চন্টকস্থিত সেনা আৰু হালোৱাটিং আৰক্ষীয়ে এই অভিযান চলাই যুৱক দুজনক গ্ৰেপ্তাৰ কৰে । অৱশ্যে আৰক্ষীয়ে ঘটনা সন্দৰ্ভত বৰ্তমানলৈকে সংবাদ মাধ্যমৰ আগত কোনো তথ্য প্ৰকাশ কৰা নাই ।
