শিৱসাগৰ,1 জুলাই: Covid 19 ৰ বিশ্বগ্ৰাসী প্ৰভাৱৰ ফলত ছন্দপতন ঘটিল ৰাজ্যৰ শিক্ষা খণ্ডৰ ৷ শিক্ষাক শিপাৰ সৈতে জড়িত ৰাখিবৰ বাবে বিদ্যালয়সমূহে আৰম্ভ কৰিলে অনলাইন শিক্ষা ব্যৱস্থা । ইণ্টাৰনেটৰ মাধ্যমেৰে আৰম্ভ হ’ল পাঠদানৰ কাৰ্যসূচী ৷ পূৰ্বে ৰাজ্যত কোনো ব্যৱস্থা নাছিল অনলাইন পাঠদানৰ ৷ ই প্ৰথমাৱস্থাত স্বাভাৱিক নাছিল শিক্ষক তথা শিক্ষাৰ্থীৰ বাবে ।
শ্ৰেণীকোঠাত সমজুৱা পাঠদানৰ সলনি এটা ম’বাইল অথবা লেপটপ লৈ অকলশৰীয়াকৈ পাঠদান গ্ৰহণ কৰিবলগীয়া হৈছে এই ব্যৱস্থাত । শূণ্য বেঞ্চৰ সন্মুখত এটা ডিভাইছ লৈ পাঠদান কৰিবলগীয়া হৈছে শিক্ষকসকলে ৷ এনে প্ৰতিকূল পৰিৱেশৰ মাজতো কিন্তু আগবঢ়াই নিব লগা হৈছে শিক্ষা অভিযান ৷ চলাই নিবলগীয়া হৈছে সকলো বিষয়ৰে পাঠদান ।
কিন্তু অনলাইন শিক্ষা আজিৰ দিনত এক জৰুৰী মাধ্যম । নতুন নতুন বিষয়ৰ সৈতে চিনাকী হৈ শিক্ষাদান আৰু শিক্ষালাভৰ সংগ্ৰামখন চলাই নিব লগা হৈছে শিক্ষক-ছাত্ৰই । এই পৰিস্থিতিত সকলোৰে এটাই মাত্ৰ প্ৰয়াস হৈছে শিক্ষাৰ গতি ৰৈ নোযোৱাৰ চেষ্টা কৰাতো । পৰিস্থিতিৰ বাবে হোৱা সলনিসমূহক কেন্দ্ৰ কৰি অভিভাৱকসকল চিন্তিত হৈছিল । বিদ্যালয়সমূহে পৰিস্থিতিৰে মোকাবিলা কৰিবলগাকৈ প্ৰস্তুত কৰিবলগীয়া হৈছিল কাৰ্যসূচী ৷ ব্যৱহাৰিক শ্ৰেণী অনুষ্ঠিত নোহোৱাৰ বাবে শিক্ষাৰ্থীৰ পৰা মাচুল সংগ্ৰহ আৰু শিক্ষকৰ দৰমহা প্ৰদান আন এক চিন্তনীয় বিষয় আছিল । লগতে অভিভাৱকৰ ব্যয়ৰ পথসমূহ হ্ৰাস কৰাও আছিল এক দায়িত্ব । যাৰ বাবে অনলাইন শ্ৰেণীসমূহ পুৱা আৰু গধূলি আৰম্ভ হৈছিল । যাতে অভিভাৱকৰ ম’বাইল-লেপটপ আদি শিক্ষাৰ্থীয়ে ব্যৱহাৰ কৰিব পাৰে ।
বিদ্যালয়,শিক্ষক,ছাত্ৰ-ছাত্ৰী,অভিভাৱক আদি সকলোৰে সন্মিলিত প্ৰচেষ্টাত এই দুৰ্যোগৰ পিছতো আগুৱাই গৈছে শিক্ষা ব্যৱস্থা । পৰৱৰ্তী সময়ত হয়তো এই অনলাইন শিক্ষাই হৈ পৰিব আনুষ্ঠানিক শিক্ষা ব্যৱস্থাৰ প্ৰধান অংশ ।
লগতে চাওকঃ শদিয়াৰ বান বিধ্বস্ত এলেকা পৰিদৰ্শন প্ৰাক্তন মন্ত্ৰী জগদীশ ভূঞাৰ
