আমগুৰি, ২৩ জুন: শনিবাৰে নিশা নামতিত উত্তেজনাময় পৰিস্থিতিৰ সৃষ্টি হয় । শতাধিক প্ৰতিবাদকাৰীয়ে নামতি বিদ্যুৎ উপকেন্দ্ৰ আৰু নামতি থানা ঘেৰাও কৰি উত্তপ্ত পৰিস্থিতিৰ সৃষ্টি কৰে ।
নামতি বিদ্যুৎ উপকেন্দ্ৰৰ অস্থায়ী কৰ্মচাৰী দিগন্ত বৰাৰ বিদ্যুৎস্পৃষ্ট হৈ মৃত্যু হোৱাক কেন্দ্ৰ কৰি ৰাইজে প্ৰতিবাদ সাব্যস্ত কৰে । শুকুৰবাৰে নামতি ষ্টেচনৰ সমীপত বৈদ্যুতিক খুটাত উঠি বিদ্যু্ৎ ব্যৱস্থা মেৰামতি কৰি থকা অৱস্থাত বিদ্যুৎস্পৃষ্ট হৈ যুৱক জনৰ মৃত্যু হৈছিল । ৰাইজৰ অভিযোগ অনুসৰি বিদ্যুৎ উপকেন্দ্ৰৰ কৰ্মচাৰীৰ ভুলৰ বাবে এই দুৰ্ঘটনাটো সংঘটিত হৈছিল ।
ইয়াৰ পাচতেই উত্তেজিত হৈ পৰে স্থানীয় লোকসকল । ক্ষোভিত লোকসকলে 'শক্তি বিভাগ মুৰ্দাবাদ' ,'অসম পুলিচ হায়-হায়' , 'এ এচ ই বি মুৰ্দাবাদ' , 'আমাক ন্যায় লাগিবই' আদি বিভিন্ন শ্লগানেৰে প্ৰতিবাদস্থলী উত্তাল কৰি তুলে । ইয়াৰোপৰিও প্ৰতিবাদকাৰীসকলে দিগন্ত বৰাৰ মৃতদেহটো বিদ্যুৎ উপকেন্দ্ৰৰ কাৰ্যালয়ৰ ভিতৰত ৰাখি ২০ লাখ টকা ক্ষতিপূৰণ আৰু দোষীক তৎকালীনভাৱে নিলম্বন কৰাৰ দাবী উত্থাপন কৰে । পৰৱৰ্তী সময়ত প্ৰতিবাদস্থলীত নাজিৰা ৰাজহ চক্ৰ বিষয়া আৰু অতিৰিক্ত আৰক্ষীৰ অধীক্ষক উপস্থিত হৈ ঘটনাৰ তৎকালীন তদন্ত কৰি দোষীক শাস্তিৰ ব্যৱস্থা কৰিব বুলি প্ৰকাশ কৰাত সাময়িকভাৱে প্ৰতিবাদকাৰী সকলে প্ৰতিবাদ উঠায় লয় ।
