নলবাৰী, ৩১ জুলাই: স্মাৰ্ট আৰক্ষীক ভেঙুচালি কৰি নলবাৰী চহৰত দিন দুপৰতে দুটাকৈ স্থানত চিলনী চোৰৰ সন্ত্ৰাস ৷ নলবাৰীৰ চ’ক বজাৰ আৰু বৰমা ৰোডত চিলনী চোৰে থপিয়ালে মহিলাৰ বেগ, সোণৰ চেইন ৷ এটা চোৰক আটক কৰিবলৈ সক্ষম হয় স্থানীয় লোকে ৷
প্ৰথমটো ঘটনাত চ'কবজাৰত ৰাস্তাৰে খোজ কাঢ়ি গৈ থকা এগৰাকী মহিলাৰ পৰা চিলনী চোৰে থপিয়াই নিয়ে বেগ৷ মহিলাগৰাকীক বেগৰ সৈতে চিলনী চোৰটোৱে কিছু দূৰ চোঁচৰাই নি স্কুটীসহ বাগৰি পৰে ৷ লগে লগে মহিলাগৰাকীয়ে চিঞৰ বাখৰ লগোৱাত স্থানীয় যুৱকসকল ততাতৈয়াকৈ ঘটনাস্থলীত উপস্থিত হয় ৷ স্থানীয় যুৱকে খেদি খেদি স্কুটী সহ কৰায়ত্ত কৰে চিলনীৰ চোৰটোক ৷ চোৰটোক কৰায়ত্ত কৰি উপস্থিত ৰাইজে পঘাৰে বান্ধি আৰক্ষীক খবৰ দিয়ে ৷
পৰৱৰ্তী সময়ত ঘটনাস্থলীত নলবাৰী আৰক্ষী উপস্থিত হৈ আটক কৰি থানালৈ লৈ আহে চোৰটোক ৷ আনহাতে চহৰখনৰ বৰমা ৰোডৰ এ এছ টি কাৰ্যালয়ৰ সন্মুখত সংঘটিত হয় আন এক চিলনী চোৰৰ সন্ত্ৰাস ৷ বাইকত অহা দুই চিলনী চোৰে টানি নিলে মহিলাৰ ডিঙিৰ সোণৰ চেইন ৷ নলবাৰী চহৰৰ মাজমজিয়াৰ পৰা ৫১ নং বৰভাগ গাওঁ পাঞ্চয়তৰ সভানেত্ৰী গিতুমনি বৈশ্যৰ ডিঙিৰ পৰা টানি নিলে সোণৰ চেইন ৷
নলবাৰীৰ মৰোৱাৰ পৰা জিলা পৰিষদৰ কাৰ্যলয়লৈ স্বামীৰ সৈতে গৈ থকা অৱস্থাত পৰিবহন নিগমৰ কাৰ্যলয়ৰ সম্মুখতে ঘটিল এই ঘটনা ৷ ঘটনা সন্দৰ্ভত মহিলা গৰাকীয়ে নলবাৰী সদৰ থানাত গোচৰ দিয়ে আৰক্ষীক ৷ এই ঘটনাই জিলাখনত আৰক্ষীৰ নিষ্ক্ৰিয়তাৰ ছবি উদঙাই দিছে ৷
লগতে পঢ়ক: Jamugurihat theft incident: চিকিংসাৰ বাবে চেন্নাইলৈ যাওতেই চোৰে চলালে চাফাই
