নলবাৰী, 21 মাৰ্চ : প্ৰকৃতিৰ বুকুত এতিয়া বসন্ত ঋতুৰ আগমন ৷ নিথৰহৈ পৰা গছজোপাতো ফুল-পাতে পোখা মেলিছে, কুলিৰ সোৱলা মাতে প্ৰকৃতিক ন-ৰূপ দিছে ৷ বসন্তৰ আগমনত ৰঙালী বিহুৰ বাবে সাজু হৈ উঠিছে ৰাজ্যৰ ঢুলীয়া-নাচনীৰ লগতে জাপি শিল্পৰ শিল্পীসকল ৷ হালোৱা-ৰোৱনীয়ে খেতি পথাৰত জাপি ব্যাৱহাৰ কৰাৰ উপৰিও জাপিয়ে বিশেষভাৱে সমাদাৰ লাভ কৰে ৰঙালী বিহুৰ সময়ত ৷ বিশেষভাৱে অসমৰ নলবাৰী জিলাক জাপি উদ্যোগৰ প্ৰাণকেন্দ্ৰ বুলিও আখ্যা দিয়া হয় ৷ বসন্তৰ আগমনৰ লগে লগে জিলাখনৰ বহুলোক বিশেষভাৱে সাজু হৈ পৰে জাপি তৈয়াৰৰ বাবে ৷ জিলাখনৰ মুগকুছি,তিলানা,দীঘেলী আৰু সূতাৰকুছিত সৰ্বাধিক ভাৱে তৈয়াৰ কৰা হয় জাপি ৷
উল্লেখযোগ্য যে, বিহুৰ প্ৰাকক্ষণত জিলাখনৰ জাপি শিল্পীসকলে দিনে-নিশাই ব্যস্ত হৈ পৰে জাপি তৈয়াৰত ৷ ফুলাম জাপিৰ পৰা আৰম্ভ কৰি হালোৱা জাপিলৈকে তৈয়াৰ কৰি তোলে শিল্পীসকলে ৷ আনকি এই জাপিসমূহ অসমৰ ভিন্ন প্ৰান্তত ৰপ্তানি কৰা হয় যদিও আৰ্থিক দৈন্যতাৰ বাবে খুব কম সংখ্যক লোকেহে এই জাপি নিৰ্মাণ কাৰ্যত জড়িত হৈ পৰে বুলি মত প্ৰকাশ কৰে শিল্পীসকলে ৷ এই গাওঁকেইখনৰ লোকসকলে কেইবা দশক ধৰি বংশানুক্ৰমে জাপি তৈয়াৰ কৰি আহিছে যদিও অসম চৰকাৰে এই লোকসকলৰ বাবে কোনো ব্যৱস্থা গ্ৰহণ নকৰাৰো দাবী উত্থাপন কৰে শিল্পীসকলে ৷ লগতে জাপি নিৰ্মাণত ব্যৱহাৰ কৰা বাঁহ,টকৌপাত,সূতা,কাপোৰ,চুমকিৰ লগতে বিভিন্ন ধৰণৰ সামগ্ৰী ক্ৰয় কৰিবলৈও অসুবিধাৰ সন্মুখীন হোৱাৰ কথা ব্যক্ত কৰাৰ লগতে যুগ যুগ ধৰি জাপি প্ৰস্তুত কৰি অসমীয়া জাতীয় জীৱনক চহকী কৰি ৰখা এই শিল্পীসকলৰ বাবে অসম চৰকাৰে কোনো ব্যৱস্থা গ্ৰহণ নকৰিলে অসমীয়া জাতীয় জীৱনৰ লগত জড়িত থকাএই শিল্পনিশ্চিহ্ন হোৱাটো স্বাভাৱিক বুলিও মন্তব্য কৰে ৷
