নলবাৰী, 3 জুন: বুধবাৰৰ পৰা চাৰিদিনীয়া কাৰ্যসূচীৰে আৰম্ভ হৈছে ৰাজ্যৰ তৃতীয় পৰ্যায়ৰ গুণোৎসৱ (Gunotsav in Assam 2022) । গুণোৎসৱৰ বাবে সকলো চৰকাৰী প্ৰাথমিক বিদ্যালয়ৰ শিক্ষক, কৰ্মচাৰী তথা ছাত্ৰ-ছাত্ৰী ব্যস্ত হৈ পৰিছে ।
সামান্তৰালভাৱে নলবাৰীতো আৰম্ভ হৈছে তৃতীয় পৰ্যায়ৰ গুণোৎসৱ ৷ জিলাখনৰ প্ৰাথমিক বিদ্যালয়ৰ প্ৰতিগৰাকী শিক্ষক, ছাত্ৰ-ছাত্ৰী এতিয়া ব্যস্ত গুণোৎসৱক লৈ । ব্যতিক্ৰম নহয় নলবাৰীৰ বনগাওঁ উচ্চতৰ মাধ্যমিক বিদ্যালয়ো ৷
'গুণোৎসৱ'ৰ তৃতীয় পৰ্যায়ৰ কাৰ্যসূচীত শুকুৰবাৰে পশ্চিম নলবাৰী শিক্ষাখণ্ডৰ অন্তৰ্গত ঐতিহ্যমণ্ডিত বনগাঁও উচ্চতৰ মাধ্যমিক বিদ্যালয়ত শিক্ষকৰ ৰূপত দেখা গ'ল বৰপেটা লোকসভা সমষ্টিৰ সাংসদ আব্দুল খালেকক (MP Abdul Khaleque attend Gunotsav 2022) ৷
বিদ্যালয়খনৰ প্ৰতিটো শ্ৰেণীকোঠাত সোমাই শিক্ষাৰ্থীৰ সৈতে সাংসদগৰাকীয়ে মত বিনিময় কৰাৰ উপৰিও বিদ্যালয়খনৰ সমস্যা সন্দৰ্ভতো বুজ লয় । সাংসদগৰাকীয়ে বিদ্যালয়খনত নতুনকৈ নিৰ্মাণ কৰি উলিওৱা এটা বিজ্ঞানাগাৰৰ দ্বাৰ মুকলি কৰে ৷
তেওঁ বিদ্যালয়খনৰ পুথিভঁৰাললৈ 25 হাজাৰ টকাৰ অনুদান আগবঢ়ায় ৷ ইয়াৰ পাছতে সাংসদ আব্দুল খালেকে বিহামপুৰ চৰকাৰী উচ্চ বুনিয়াদী বিদ্যালয়খন পৰ্যবেক্ষণ কৰে ৷ উল্লেখ্য যে জিলাখনৰ 1,227 খন চৰকাৰী বিদ্যালয়ত বুধবাৰে স্ব-মূল্যায়ন সম্পন্ন হোৱাৰ পাছত এতিয়া প্ৰতিখন বিদ্যালয়তে বহিঃমূল্যায়কৰ দ্বাৰা বিদ্যালয়সমূহ মূল্যায়ণ কৰা হ’ব ৷
লগতে পঢ়ক : মন্ত্ৰীসভাঃ দুই মিত্ৰদলৰ পৰা অন্তৰ্ভুক্ত হ'বনে কোনোবা ?
