নলবাৰী, ৩১ অক্টোবৰ : বিশেষভাৱে সক্ষম (Differently abled) লোকসকলৰ বাবে অসম চৰকাৰে সমাজ কল্যাণ বিভাগ (social welfare department) ৰ অধীনত ‘দীন দয়াল দিব্যাংগ পেঞ্চন আঁচনি’ (Deen Dayal Divyangjan Sahajya Scheme) আৰম্ভ কৰিছে ৷ এই আঁচনিৰ জৰিয়তে বিশেষভাৱে সক্ষম লোকসকলৰ বাবে এক বিশেষ পদক্ষেপ গ্ৰহণ কৰিছে ৰাজ্য চৰকাৰে । এই হিতাধিকাৰী আঁচনিখনৰ যোগেদি ৰাজ্যৰ বিশেষভাৱে সক্ষম লোকসকলৰ স্বাস্থ্যৰ যত্ন ল'ব পৰাকৈ মাহেকীয়া পেঞ্চন প্ৰদান কৰা হয় ।
পিছে বিগত কেবাবছৰো নলবাৰী জিলাৰ মুকালমুৱাৰ বিশেষভাৱে সক্ষম লোকসকলৰ অধিকাংশই বঞ্চিত হৈ আহিছে দীনদয়াল দিব্যাংগ পেঞ্চন আঁচনি সমূহৰ পৰা ৷ ফলত অঞ্চলটোৰ দিব্যাংগসকলৰ মাজত সৃষ্টি হৈছে এক হাহাকাৰমুখৰ পৰিস্থিতি ৷ যিসকলে দীনদয়াল দিব্যাংগ পেঞ্চন আঁচনিৰ ধন লাভ কৰিছিল সেই সকলৰো এই আঁচনিৰ পৰা নাম কৰ্তন হোৱাত সম্প্ৰতি ক্ষোভিত হৈ পৰিছে তেওঁলোক ।
বৰক্ষেত্ৰী বিকলাংগ সন্থাৰ সভাপতিয়ে জানিব দিয়া মতে, বৰক্ষেত্ৰী অঞ্চলৰ প্ৰায় ৫০ শতাংশ দিব্যাংগই চৰকাৰে প্ৰদান কৰা দীনদয়াল দিব্যাংগ পেঞ্চন আঁচনি পৰা বঞ্চিত হৈ আহিছে ৷
ইফালে অঞ্চলটোৰ অধিকাংশ দৰিদ্ৰ লোকে অৰুণোদয় আচঁনিৰ ধন লাভ কৰা নাই (Many disabled people deprived of Arunodoi) । বৰক্ষেত্ৰী বিকলাংগ সন্থাৰ সভাপতিয়ে মুকালমুৱাৰ বিশেষভাৱে সক্ষম লোকসকলক দীনদয়াল দিব্যাংগ পেঞ্চন তথা দুখীয়ালোকসকলক অৰুণোদয় আচঁনি প্ৰদান কৰিবলৈ চৰকাৰক কাতৰ অনুৰোধ জনায় ।
উল্লেখ্য যে, সমাজৰ শাৰীৰিকভাৱে প্ৰত্যাহ্বানৰ মুখামুখি হোৱা লোকসকলৰ কল্যাণৰ বাবে কেন্দ্ৰীয় আৰু ৰাজ্য চৰকাৰসমুহে বহু আঁচনি গ্ৰহণ কৰি ৰূপায়ণ কৰিছে ৷ অসম চৰকাৰে আন্ত:ৰাষ্ট্ৰীয় প্ৰতিবন্ধী দিৱসৰ লগত সংগতি ৰাখি সমাজ কল্যাণ বিভাগৰ (Social Welfare Department) অধীনত গুৱাহাটীৰ সৰুসজাই ষ্টেডিয়ামত (Indira Gandhi Athletic Stadium) দীনদয়াল দিব্যাংগ সাহায্য আঁচনিৰ শুভাৰম্ভ কৰে ।
এই আঁচনিখনৰ যোগেদি ৰাজ্যখনৰ ৪,৫০,০০০ দিব্যাংগৰ সু-চিকিৎসাৰ বাবে প্ৰতিগৰাকী দিব্যাংগলৈ ৫ হেজাৰ টকাকৈ আৰ্থিক সাহায্য প্ৰদান কৰা হয় ৷
লগতে পঢ়ক: GMC Scam : জিএমচিৰ বোকা কেলেংকাৰীৰ অন্যতম অভিযুক্ত তছদিকুৰ ৰহমানে প্ৰদান কৰা নাই সম্পত্তি কৰ
