নলবাৰী, 2 আগষ্টঃ ঐক্য সম্প্ৰীতিৰ ৰাজ্য অসমক জেহাদী সংগঠনে ইছলামিক ৰাষ্ট্ৰ বনাবলৈ যি অপচেষ্টা চলাই আছে তাক প্ৰতিহত কৰিব মুছলমান সমাজে ৷ অসম কোনো মুছলমান জেহাদীৰ দুষ্কাৰ্য সৈতে জড়িত নহয় ৷ এই দাবী সদৌ অসম গৰিয়া মৰিয়া যুৱ ছাত্ৰ পৰিষদৰ ৷ শুকুৰবাৰে নলবাৰীত আয়োজিত এক সংবাদ মেলত সংগঠনটোৱে অসমৰ পৰা জেহাদী সংগঠন সমূহক উৎখাত কৰাৰ দাবী জনায় সংগঠনটোৱে ৷ সংবাদ মেল খনত সংগঠনটোৱে অতি সংগোপনে উগ্ৰপন্থী কাৰ্যকলাপ চলাই ৰাজ্যখনত জেহাদ সৃষ্টিৰ চেষ্টা চলোৱা উগ্ৰপন্থী জামাতউল মুজাহিদিন বাংলাদেশ,হিজবুল মুজাহিদিনকে ধৰি আটাইবোৰ জেহাদী সংগঠনক উৎখাত কৰাৰ দাবী জনায় ৷
সংবাদ মেলত বক্তব্য প্ৰদান কৰি সংগঠনটোৰ সাধাৰণ সম্পাদক মইনুল হ'কে কয় যে হাৱালাৰ জৰিয়তে বহিঃ ৰাষ্ট্ৰৰ পৰা পৰা ধন যোগান ধৰি একাংশ বিদেশী ৰাষ্ট্ৰই সন্ত্ৰাসবাদী সংগঠনসমূহক সহায় কৰি আহিছে ৷ হাৱালাৰ জৰিয়তে যাতে অসম তথা ভাৰতবৰ্ষলৈ উগ্ৰপন্থীৰ নামত ধন নাহে তাৰ প্ৰতি কেন্দ্ৰ আৰু ৰাজ্য চৰকাৰক তীক্ষ্ন নজৰ ৰখাৰ বাবে আহ্বান জনায় সাধাৰণ সম্পাদকজনে ৷ ভাৰত ৰাষ্ট্ৰক অস্থিৰ কৰি তুলিবলৈ ৰাজ্যখনত সক্ৰিয় হৈ থকা মৌলবাদী সংগঠনসমূহক উৎখাত কৰিবলৈ মইনুল হ'কে চৰকাৰৰ ওচৰত বাৰে বাৰে দাবী জনায় ৷
বিয়লি চাৰি বজাত অনুষ্ঠিত সংবাদ মেলখনত সাহিত্যিক ৰফিউল হুচেইন বৰুৱা, সংগঠনটোৰ কেন্দ্ৰীয় সহকাৰী সম্পাদক চায়েফ আলী,নলবাৰী জিলা সমিতিৰ সভাপতি আজাদ আলী,সম্পাদক হাৰেজ আলী,মুখ্য উপদেষ্টা মেহবুব আলী,প্ৰচাৰ সম্পাদক জোন আহমেদ,নুৰুল হ'ক, কামৰূপ জিলা সমিতিৰ সভাপতি তাৰিকুল হুচেইনকে ধৰি ভালেসংখ্যক নেতা উপস্থিত থাকে৷
