নগাঁও, 29 জুলাই : এজন যুৱকৰ মৃতদেহ উদ্ধাৰ হোৱাক লৈ নগাঁৱৰ ধিঙত চাঞ্চল্যৰ সৃষ্টি হৈছে ৷ ডিঙিত চিপ লোৱা অৱস্থাত উদ্ধাৰ কৰা হৈছে এজন যুৱকৰ মৃতদেহ ৷ যুৱকজনক হত্যা কৰি আত্মহত্যাৰ ৰূপ দিয়াৰ অভিযোগ পৰিয়ালৰ ৷
শনিবাৰে পুৱা নগাঁৱৰ ধিঙত ডিঙিত চিপ লোৱা অৱস্থাত এজন যুৱকৰ মৃতদেহ উদ্ধাৰ হোৱাৰ পিচতে হুৱা-দুৱা পৰিৱেশৰ সৃষ্টি হয় ৷ ধিঙৰ ধূপাগুৰি বজাৰত ঘৰৰ সন্মুখতে চিপ লৈ থকা অৱস্থাত উদ্ধাৰ হয় ফকৰ উদ্দিন নামৰ যুৱকজনৰ মৃতদেহ ৷ ডিঙিত চিপ লৈ থকা অৱস্থাত যুৱকজনৰ মৃতদেহ উদ্ধাৰ হয় যদিও এয়া আত্মহত্যা বুলি কোনো কাৰণতে মানি ল'ব পৰা নাই পৰিয়ালৰ লোকে ৷ পৰিয়ালৰ লোকৰ অভিযোগ মতে এয়া কোনো আত্মহত্যাৰ ঘটনা নহয়, কোনো দুৰ্বৃত্তই হত্যা কৰি আত্মহত্যাৰ ৰূপ দিয়াৰ চেষ্টা কৰিছে ।
ইফালে, পৰিয়ালৰ লোকৰ অভিযোগ অনুসৰি, কালি অৰ্থাৎ শুকুৰবাৰে সন্ধিয়া ফকৰ উদ্দিনৰ সৈতে স্থানীয় কেইজনমান যুৱকৰ সাধাৰণ কথাক লৈ সূত্ৰপাত হৈছিল কাজিয়াৰ ৷ সেই সময়তে স্থানীয় ৰাইজে কাজিয়া ভাঙি সকলোকে ঘৰলৈ আঁতৰাই পঠাই দিয়ে ৷ তাৰ পিচতে ফকৰ উদ্দিন নামৰ ব্যক্তিজনক পুৱাৰ ভাগত নিজৰ ঘৰৰ ওচৰত চিপ লোৱা প্ৰত্যক্ষ কৰে ৰাইজে । সেয়ে এয়া এক পৰিকল্পিত হত্যাকাণ্ড বুলি দাবী কৰিছে পৰিয়ালৰ লোকে । এতিয়া সন্দেহৰ আঙুলি উঠিছে নিশা কাজিয়াত লিপ্ত হোৱা তিনি যুৱকৰ বিৰুদ্ধে ৷
ইতিমধ্যে আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰিছে ৷ আৰক্ষীয়ে ঘটনা সন্দৰ্ভত প্ৰাথমিক তদন্ত আৰম্ভ কৰিছে ৷ এতিয়ালৈ যুৱকজনৰ মৃত্যুৰ প্ৰকৃত কাৰণ পোহৰলৈ অহা নাই যদিও আৰক্ষীৰ তদন্তৰ পাচতহে পোহৰলৈ আহিব এয়া হত্যা আত্মহত্যা ৷ সম্প্ৰতি এই ঘটনাক লৈ বৃহত্তৰ অঞ্চলটোত চেঁপা উত্তেজনা অব্যাহত আছে ।
লগতে পঢ়ক: Manipur naked women parade video : গোচৰটোৰ তদন্তৰ দায়িত্ব গ্ৰহণ CBIৰ
