নগাঁও,৩০ ছেপ্টেম্বৰ : বনহংস সাংস্কৃতিক গোষ্ঠীৰ (Banhankha Cultural group) উদ্যোগত বুধবাৰে নগাঁও জিলা পুথিভঁৰালত এখন প্ৰাচীৰ পত্ৰিকা (Wall Magazine) উন্মোচন কৰা হয় । বনহংস সাংস্কৃতিক গোষ্ঠীৰ সক্ৰিয় সদস্য তথা সদ্য প্ৰয়াত অমৰনাথ বৰাৰ শ্ৰদ্ধাঞ্জলি সংখ্যা হিচাপে এই প্ৰাচীৰ পত্ৰিকাখন উন্মোচন কৰা হয় । এই প্ৰাচীৰ পত্ৰিকাখন উন্মোচন কৰে বিশিষ্ট চিত্ৰশিল্পী টিকেন্দ্ৰজিৎ শইকীয়াই ।
অনুষ্ঠানত বিশিষ্ট চলচ্চিত্ৰ নিৰ্মাতা অৰূপ মান্না, বিশিষ্ট নাট্যকৰ্মী সপোনটি বৰদলৈ, জ্যেষ্ঠ সাংবাদিক মানস কুমাৰ মহন্ত, ক্ৰীড়া সংগঠক তপন দাস, জিলা পুথিভঁৰালৰ গ্ৰন্থাগাৰিক মুনীন্দ্ৰ ডেকা উপস্থিত থাকে । অনুষ্ঠানতে প্ৰাণজিৎ শইকীয়াই অমৰনাথ বৰাৰ স্মৃতিচাৰণ কৰে । প্ৰাচীৰ পত্ৰিকাখনৰ সম্পাদনা কৰিছে মুকুট ৰঞ্জন শইকীয়াই ।
উল্লেখ্য যে, যোৱা ১৪ ছেপ্টেম্বৰত অমৰনাথ বৰাৰ ক'ভিডত (Covid) আক্ৰান্ত হৈ মৃত্যু হৈছিল । তেওঁৰ ঘৰ তিনিচুকীয়া জিলাত যদিও নগাঁও জিলাৰ সৈতে তেওঁৰ অভিন্ন সম্পৰ্ক আছিল । বনহংস সাংস্কৃতিক গোষ্ঠীৰ তেওঁ প্ৰতিষ্ঠাপক সদস্য আছিল । লক ডাউনৰ সময়ত তেওঁ ফেচবুকত ৪ খনকৈ সুখপাঠ্য আৰু অভিনৱ বিষয়বস্তুৰ ওপৰত উপন্যাস লিখি জনপ্ৰিয় হৈছিল ।
লগতে পঢ়ক : নদীবান্ধৰ বিৰুদ্ধে লখিমপুৰত AJYCP ৰ অৱস্থান ধৰ্মঘট
