ৰহা, 28 নৱেম্বৰ: ৰহা আৰক্ষী থানাৰ অন্তৰ্গত জোঙালবলহু গড়ৰ ৩৭ নং ৰাষ্ট্ৰীয় ঘাইপথৰ দাঁতিত বৃহস্পতিবাৰে সন্ধিয়া উদ্ধাৰ হয় এজন অচিনাক্ত যুৱকৰ মৃতদেহ। জানিব পৰা মতে, একাংশ দাৱনীয়ে ঘৰলৈ উভতাৰ পথত জোঙালবলহু গড় বিদ্যুত উপকেন্দ্ৰৰ সমীপৰ ৰাষ্ট্ৰীয় ঘাইপথৰ দাঁতিৰ জংঘলত মৃতদেহটো প্ৰত্যক্ষ কৰে ৷
লগে লগে দাৱনীসকলে স্থানীয় গাঁও সুৰক্ষা বাহিনীৰ লোকক খবৰ দিয়াৰ লগতে ৰহা আৰক্ষীকো খবৰ দিয়ে। পৰৱৰ্তী সময়ত ৰহা আৰক্ষী থানাৰ ভাৰপ্ৰাপ্ত বিষয়া লক্ষণ দাসসহ আৰক্ষীৰ এটা দলে ঘটনাস্থলীত উপস্থিত হৈ মৃতদেহটো উদ্ধাৰ কৰি মৰনোত্তৰ পৰীক্ষাৰ বাবে নগাঁও ভোগেশ্বৰী ফুকননী অসামৰিক চিকিৎসালয়লৈ প্ৰেৰণ কৰে।
উল্লেখ্য যে ক'লা লংপেন্ট, ৰঙা-ক'লা চাৰ্ট আৰু ক'লা জেকেট পৰিহিত প্ৰায় ৩৫ বছৰীয়া যুৱকজনক অন্য ঠাইত ডিঙি ৰেপি হত্যা কৰি উক্ত স্থানত পেলাই থৈ যোৱাৰ সন্দেহ প্ৰকাশ কৰে আৰক্ষীয়ে। আৰক্ষীয়ে উক্ত ঘটনা সন্দৰ্ভত তদন্ত অব্যাহত ৰাখিছে যদিও বৰ্তমান সময়ৰলৈকে চিনাক্ত হোৱা নাই মৃত যুৱকজনৰ পৰিচয়।
লগতে পঢ়ক: ISIS-ৰ দৰে সন্ত্ৰাসবাদী সংগঠনে বিশেষ সুযোগৰ সন্ধানত খোপনি পুটিছে অসমত : ৰাজ্যপাল জগদীশ মুখী
