কলিয়াবৰ,30 মে’: কলিয়াবৰৰ এজন প্ৰতিভাৱান চিত্ৰশিল্পী সূৰুয বৰকটকী । শৈশৱৰে পৰা ছবি আঁকি ভালপোৱা সূৰুযে শেহতীয়াকৈ গঢ়িছে এক বিশেষ অভিলেখ । সুধাকণ্ঠ ড৹ ভূপেন হাজৰিকাৰ মুখায়বয়ৱ এটা ক্ষুদ্ৰ শিলত অংকন কৰি ৰাজ্যিক অভিলেখ গঢ়িবলৈ সক্ষম হৈছে । কলিয়াবৰৰ হাটবৰৰ সূৰুয বৰকটকী নামৰ চিত্ৰশিল্পী গৰাকীয়ে 3.5 চে: মি: x 7 চে: মি: আকাৰৰ এটা শিলত সুধাকণ্ঠৰ প্ৰতিকৃতি অংকন কৰি অসম বুক অৱ ৰেকৰ্ডছত নিজৰ নাম অন্তৰ্ভুক্ত কৰিবলৈ সক্ষম হৈছে ৷
কলিয়াবৰ মহাবিদ্যালয়ৰ পৰা কলা শাখাৰ স্নাতক ডিগ্ৰীধাৰী সূৰুযে শৈশৱৰে পৰাই নিজস্ব সাধনাৰে বিভিন্ন চিত্ৰ অংকন কৰি আহিছে । বিভিন্ন বিষয়ৰ লগতে স্বনামধন্য শিল্পী-সাহিত্যিকৰ প্ৰতিকৃতি অংকন কৰি সূৰযে প্ৰশংসা বুটলিবলৈ সক্ষম হৈছে । ইতিমধ্যে, জুবিন গাৰ্গ, খগেন মহন্ত, হোমেন বৰগোহাঞিৰ লগতে নৰেন্দ্ৰ মোডী, তৰুণ গগৈ, কেশৱ মহন্ত, অখিল গগৈ আদি বিশিষ্ট ব্যক্তিৰ প্ৰতিচ্ছবি জীৱন্ত হৈ উঠিছে সূৰুযৰ কেনভাচত ।
উল্লেখযোগ্য যে, চিত্ৰকলাৰ কোনো আনুষ্ঠানিক শিক্ষা নথকাকৈয়ে সূৰুযে নিজস্ব সাধনাৰে নিমগ্ন হৈ আছে চিত্ৰ অংকনত । নিজাকৈ এখন চিত্ৰাংকন বিদ্যালয় আৰম্ভ কৰি চিত্ৰ শিল্পৰ শিক্ষা প্ৰদান কৰি আছে যুৱকজনে । শেহতীয়াকৈ এটা ক্ষুদ্ৰ শিলত চিত্ৰ আঁকি অভিলেখ গঢ়া সূৰুয বৰকটকীয়ে আন কেইবাটাও কামৰ পৰিকল্পনা হাতত লৈছে ৷ সেই সকলো পৰিকল্পনা পূৰণৰ বাবে তেওঁ এতিয়া ৰাইজৰ আশীৰ্বাদ বিচাৰিছে ।
লগতে পঢ়ক: তেজপুৰ শালনিবাৰী বিমানবন্দৰত ঘৰুৱা বিমানৰ সংখ্যা বৃদ্ধিৰ সম্ভাৱনা
