নগাঁও, 24 জানুৱাৰী : শেহতীয়াকৈ পোহৰলৈ আহিছে গুলীবিদ্ধ ছাত্ৰ নেতা কীৰ্তিকমল বৰাৰ এখন ফটো (Student leader Kirti Kamal Borah) ৷ ফটোখন ২০১৯ চনৰ এখন ফটো । সেই সময়ত নগাঁও মহাবিদ্যালয়ৰ ছাত্ৰ একতা সভাৰ সাধাৰণ সম্পাদক আছিল এইজন কীৰ্তিকমল বৰা । সেই সময়ত নাগৰিকত্ব সংশোধনী আইনৰ বিৰুদ্ধে ৰাজ্যজুৰি গঢ়ি উঠিছিল আন্দোলন । সমগ্ৰ ৰাজ্যৰ ছাত্ৰ সমাজৰ দৰেই কীৰ্তিকমল বৰাইয়ো অংশগ্ৰহণ কৰিছিল আন্দোলনত। হাতত এখন প্লে কাৰ্ড, য’ত লিখা আছিল " লুইতপৰীয়া ডেকা মই, মৰিবলৈ নাই ভয় ।''
মৰিবলৈও ভয় নকৰা কীৰ্তিকমল বৰা নামৰ এই ডেকা ল'ৰাজনেই এতিয়া ঘুণীয়া হ'ল নগাঁও আৰক্ষীৰ বন্দুকৰ গুলীত । শনিবাৰে, সন্ধিয়া মাকৰ ঔষধ আনিবলৈ ঘৰৰ পৰা ওলাই যোৱা কীৰ্তিকমল ঔষধ লৈ ঘৰ পোৱাৰ বিপৰীতে পালেগৈ গুৱাহাটী চিকিৎসা মহাবিদ্যালয় । ঔষধ লৈ ঘৰ উভতাৰ সময়তেই ঘটিল অঘটনটো। ঘৰৰ সমীপতে আৰক্ষীৰে বাক বিতণ্ডাত লিপ্ত হোৱা কীৰ্তিকমলৰ সোঁ ভৰি হঠাৎ ভেদিলে আৰক্ষীৰ গুলীয়ে (Student Leader Shot by Police in Nagaon) ৷
লুইতপৰীয়া এইজন কীৰ্তিকমল বৰাই সপোন দেখিছিল আৰক্ষী বিষয়া হোৱাৰ । মেধাবী কীৰ্তিকমলক লৈ পৰিয়ালৰো আছিল সপোন। কিন্তু আজি সকলো সপোন যেন ভাঙি চুৰমাৰ কৰিলে আৰক্ষীৰ এটা গুলীয়ে ।
আৰক্ষীৰ গুলীত আহত কীৰ্তিকমল বৰাৰ বিৰুদ্ধে ড্ৰাগছ সেৱনৰ অভিযোগ উত্থাপন কৰিছিল আৰক্ষীয়ে। কিন্তু আৰক্ষীৰ এই অভিযোগ কোনো কাৰণতেই মানি ল'ব পৰা নাই কীৰ্তিকমল বৰাৰ পৰিয়াল তথা নগাঁওবাসীয়ে । ঘটনাক লৈ ৰাজ্যজুৰি সৃষ্টি হোৱা প্ৰতিবাদৰ পিছত মুখ্যমন্ত্ৰী ড৹ হিমন্ত বিশ্ব শৰ্মাই ঘোষণা কৰিছে তদন্ত । এতিয়া উৰহী গছৰ ওৰ ওলোৱালৈ আমি ৰ’ব লাগিব তদন্ত প্ৰক্ৰিয়াৰ সমাপ্তিলৈকে ৷ হয়তো সময়েহে উত্তৰ দিব কোন সঁচা আৰু কোন মিছা ৷
লগতে পঢ়ক : Nagaon police encounter: কীৰ্তি কমল বৰাৰ এনকাউণ্টাৰৰ ন্যায়িক তদন্ত দাবী আছুৰ
