কলিয়াবৰ, 7 নৱেম্বৰ : শিল্পপ্ৰাণ চন্দ্ৰ ফুকন সোঁৱৰণী পৰ্যটন ক্ষেত্ৰত অসম পৰ্যটন বিভাগে শিল্পপ্ৰাণ গৰাকীৰ কলিয়াবৰৰ কুঠৰীস্থিত বাসভৱনৰ চৌহদত নিৰ্মাণ কৰা পৰ্যটন নিৱাস শেহতীয়াকৈ পৰ্যটকসকলৰ বাবে মুকলি কৰাৰ লগতে এখন 'কেফেটেৰীয়া'ৰো ব্যৱস্থা কৰিছে । সেই সংক্ৰান্তত পৰ্যটন বিভাগে আৱাসটোৰ সমুখভাগত লগোৱা ফলকত 'কুঠৰী' শব্দটো ইংৰাজী ভাষাত 'কুঠুৰী' লিখাত স্থানীয় সচেতন মহল ক্ষুব্ধ হৈ পৰিছে ।
পৰ্যটন বিভাগৰ এনে বহুৱালীৰ বিৰুদ্ধে প্ৰতিক্ৰিয়া প্ৰকাশ কৰিছে কুঠৰীৰ সচেতন নাগৰিকে । কুঠৰীৰ সচেতন নাগৰিকে লগতে অসমীয়া ভাষা প্ৰচলনৰ ক্ষেত্ৰত চৰকাৰে সদিচ্ছা দেখুৱাই ফলকখনত অসমীয়া ভাষা ব্যৱহাৰ কৰিবলৈও দাবী জনাইছে । অসম চৰকাৰৰ গুৰুত্বপূৰ্ণ এটা বিভাগে নিৰ্মাণ কৰা পৰ্যটন আৱাসটোৰ থকা স্থানৰ নামটোও শুদ্ধকৈ লিখিব নজনা বিভাগটো পৰ্যটন উন্নয়নৰ ক্ষেত্ৰত কিমান সচেতন সেইলৈ এতিয়া প্ৰশ্ন উত্থাপিত হৈছে ।
অসম চৰকাৰৰ পৰ্যটন দপ্তৰৰ দায়িত্ব লৈয়েই মন্ত্ৰী বিমল বৰাই নিৰ্মাণৰত শিল্পপ্ৰাণ চন্দ্ৰ ফুকন সোঁৱৰণী পৰ্যটন ক্ষেত্ৰ পৰিদৰ্শন কৰি অনতিপলমে মুকলি কৰি দিয়াৰ কথা ঘোষণা কৰিছিল । কলিয়াবৰ মহকুমাৰ অন্তৰ্গত কাজিৰঙা ৰাষ্ট্ৰীয় উদ্যানৰ দৰ্শনাৰ্থীৰ বাবে মুকলি কৰি দিয়া বাগৰি বনাঞ্চলৰ নাতিদূৰৈতে অৱস্থিত এই পৰ্যটন আৱাসটো দূৰ-দূৰণিৰ পৰ্যটকসকলৰ থকা-খোৱাৰ অসুবিধা দূৰ কৰাত গুৰুত্বপূৰ্ণ ভূমিকা গ্ৰহণ কৰিব বুলি থাৱৰ কৰা হৈছে ।
লগতে পঢ়ক : বাল গংগাধৰ তিলকক কিয় 'Father of Indian Unrest' হিচাপে অভিহিত কৰিছিল ব্ৰিটিছে ?
