কলিয়াবৰ, 14 ফেব্ৰুৱাৰী : কলিয়াবৰত শনিবাৰে নিশা পথ দুৰ্ঘটনাত এজন যুৱকৰ মৃত্যুক কেন্দ্ৰ কৰি দেওবাৰে উত্তপ্ত হৈ পৰে শিলঘাট আৰক্ষী চকী ৷ দেওবাৰে শতাধিক লোকে যুৱকজনৰ মৃতদেহ লৈ শিলঘাট আৰক্ষী চকী ঘেৰাও কৰে ৷
ট্ৰেক্টৰৰ খুন্দাত নিহত যুৱকজনক দোষীক শীঘ্ৰে কৰায়ত্ব কৰাৰ দাবীত শিলঘাট আৰক্ষী চকীৰ সন্মুখত জনতাই উত্তাল পৰিৱেশৰ সৃষ্টি কৰে ৷
উল্লেখ্য যে, কলিয়াবৰৰ চামধৰা গাঁৱত শনিবাৰে নিশা তীব্ৰবেগী ট্ৰেক্টৰৰ খুন্দাত নিহত হৈছিল বাঘৰচুক গাঁৱৰ প্ৰশান্ত শইকীয়া নামৰ এজন মটৰ চাইকেল আৰোহী ৷ দুৰ্ঘটনা সংঘটিত কৰি সেই স্থানৰ পৰা পলায়ন কৰে ট্ৰেক্টৰখনৰ চালক ৷
নিশা প্ৰায় আঠ বজাত দুৰ্ঘটনা সংঘটিত হোৱা পাছত দেওবাৰে বিয়লিলৈকে আৰক্ষীয়ে দোষীক কৰায়ত্ব কৰিব নোৱাৰাত শিলঘাট আৰক্ষী চকীৰ সমুখত ৰুদ্ৰমূৰ্তি ধাৰণ কৰে বাঘৰচুকৰ ৰাইজে । পৰিৱেশ অধিক উত্তপ্ত হৈ পৰাত জনতাক শান্ত কৰিবলৈ কলিয়াবৰ মহকুমাৰ কাৰ্যবাহী দণ্ডাধীশ ঘটনাস্থলীত উপস্থিত হ’বলগীয়া হয় ৷
লগতে পঢ়ক : সমষ্টিক লৈ স্থিতি স্পষ্ট নহয় দুই প্ৰধান ৰাষ্ট্ৰীয় দলৰ ৰাজ্যিক সভাপতিৰ
