নগাঁও,১৩ জুন: হাতে হাতে ধনু কাঁড়, জোং আদি অস্ত্ৰ শস্ত্ৰ । লগত আছে ঢোলসহ বিভিন্ন বাদ্য যন্ত্ৰ । সোমবাৰে এইদৰে চাওঁতাল জনগোষ্ঠীটোক বছৰ বছৰ ধৰি বঞ্চনা কৰি অহাৰ অভিযোগ উত্থাপন কৰি নগাঁও জিলা উপায়ুক্ত কাৰ্যালয়ৰ সন্মুখত প্ৰতিবাদ সাব্যস্ত কৰে চাওঁতাল ছাত্ৰ সন্থাই (Santal Students Union protest in Nagaon) ।
এই প্ৰতিবাদী কাৰ্যসূচীৰ জৰিয়তে অসম চৰকাৰে চাহ জনজাতিক জাতিগত প্ৰমাণ দিয়াৰ বাবে কৰা ঘোষণাক ধিক্কাৰ জনাই চাওঁতাল জনগোষ্ঠীক বনিয়াৰ হাতত প্ৰদান কৰাৰ ব্যৱস্থা বন্ধ কৰিবলৈ চৰকাৰক আহ্বান জনায় সংগঠনটোৱে ৷ লগতে স্বাধীনতাৰ পিছৰ পৰাই চাওঁতাল জনগোষ্ঠীৰ লোকসকল কেৱল শোষণ আৰু বঞ্চনাৰ সন্মুখীন হৈ অহা বুলি অভিযোগ উত্থাপন কৰি সংগঠনটোৱে চাওঁতাল সকলক অতি শীগ্ৰেই জনজাতিকৰণ কৰিবলৈ দাবী জনায় ।
ইয়াৰ লগতে অসমৰ ক্ষুদ্ৰ ক্ষুদ্ৰ জনগোষ্ঠীক চৰকাৰে প্ৰতাৰণা কৰিলে চাওঁতাল জনগোষ্ঠীৰ লগতে অন্যান্য জনগোষ্ঠীৰ লোকসকলো চৰকাৰৰ বিৰুদ্ধে ৰাজপথলৈ ওলাই আহিব বুলিও হুংকাৰ দিয়ে চাওঁতাল ছাত্ৰ সন্থাই ৷ প্ৰতিবাদৰ অন্তত চাওঁতাল জনগোষ্ঠীটোৰ সমস্যাসমূহ সমাধানৰ দাবীত জিলা উপায়ুক্তৰ জৰিয়তে ৰাজ্যৰ মুখ্যমন্ত্ৰীলৈ এখন স্মাৰক পত্ৰ প্ৰেৰণ কৰে (Memorandum sent to Assam CM) সংগঠনটোৱে ।
