নগাঁও, 20 নৱেম্বৰ: নগাঁৱৰ ৰূপহীহাটৰ খাটোৱালত শুকুৰবাৰে সন্ধিয়া সংঘটিত হয় চাঞ্চল্যকৰ পথ ডকাইতিৰ ঘটনা । ডকাইতৰ দলে গুলি ফুটাই ৰূপহীহাটৰ গড়াজানৰ ইলিয়াছ ৰহমত উল্লাহ নামৰ যুৱকজনৰ পৰা লুটি নিয়ে সাত লাখ পঞ্চাশ হেজাৰ টকা ৷
পাঞ্জাৱ নেচনেল বেংকৰ গড়াজানৰ বাণিজ্যিক প্ৰতিনিধিৰূপে কৰ্মৰত ইলিয়াছ ৰহমত উল্লাহ নামৰ যুৱকজনে বেংকৰ পৰা ধনসমূহ লৈ বাইকেৰে গৈ থকা অৱস্থাত খাটোৱালত দুজনীয়া ডকাইতৰ দলে আক্ৰমণ কৰে ৷ ডকাইতৰ দলটোৱে ইলিয়াছক পুখুৰীত পেলাই দিয়াৰ লগতে বাইকত থকা মোনা ভৰ্তি ধনসমূহ লৈ উধাও হয় ।
যুৱকজনে ডকাইত দুটাক বাধা দিয়াৰ চেষ্টা চলাই যদিও ডকাইতে যুৱকজনলৈ লক্ষ্য কৰি গুলি চলাই গুচি যায় । অৱশ্যে ডকাইতটোৰ গুলী লক্ষ্যভ্ৰষ্ট হোৱাত এক ডাঙৰ অঘটনৰ পৰা যুৱকজন কথমপি ৰক্ষা পৰে । বৰ্তমান ঘটনাস্থলীত ৰূপহীহাটৰ আৰক্ষী উপস্থিত হৈ তদন্ত আৰম্ভ কৰিছে ।
লগতে পঢ়ক: আলফা (স্বা) ৰ ছেকেণ্ড লেঃ প্ৰান্তিক অসমক আটক
