নগাঁও,১৯ মে': নিষিদ্ধ ড্ৰাগছৰ বিৰুদ্ধে নগাঁও আৰক্ষীয়ে ধাৰাবাহিক অভিযান চলাই নগাঁৱক ড্ৰাগছমুক্ত কৰাৰ চেষ্টা অব্যাহত ৰখাৰ সময়তে ড্ৰাগছৰ বিৰুদ্ধে নগাঁৱৰ ৰাইজো সজাগ হোৱা পৰিলক্ষিত হৈছে । ড্ৰাগছ সৰবৰাহকাৰীৰ বিৰুদ্ধে এতিয়া নগাঁও আৰক্ষীৰ সমান্তৰালকৈ যেন একগোট হৈছে নগাঁৱৰ জনতাও (Vigilant people against drugs)।
বুধবাৰে সন্ধিয়া নগাঁৱৰ শ'লমাৰীৰ ইটাপাৰাত স্থানীয় ৰাইজে বুজন পৰিমাণৰ নিচাজাতীয় ঔষধসহ এটা ড্ৰাগছ সৰবৰাহকাৰীক আটক কৰিবলৈ সক্ষম হয়(Public seized drugs in Nagaon) । অঞ্চলটোত এখন অচিনাকী গাড়ী ঘূৰি ফুৰি থকাত সন্দেহ ওপজে স্থানীয় ৰাইজৰ । যাৰ পৰিপ্ৰেক্ষিতত ৰাইজে গাড়ীখন তালাচী চলোৱাত গাড়ীখনৰ পৰা উদ্ধাৰ হয় ৫ কাৰ্টন নিচাজাতীয় ঔষধ ।
স্থানীয় ৰাইজে চাৰিচকীয়া বাহনখনৰ লগতে নিচাজাতীয় ঔষধখিনি জব্দ কৰে । লগতে বাহনখনত থকা ইফতিকাৰ হুছেইন নামৰ লোকজনকো আটক কৰে স্থনীয় ৰাইজে ।
নিচাজাতীয় ঔষধসহ ড্ৰাগছ সৰবৰাহকাৰীটোক আটক কৰি স্থানীয় ৰাইজে নগাঁও সদৰ আৰক্ষীক খবৰ দিয়াত ঘটনা স্থলীত উপস্থিত হয় নগাঁও আৰক্ষীৰ এটা দল । AS 01 BZ 9902 নম্বৰৰ জেন গাড়ীখন জব্দ কৰে আৰক্ষীয়ে । ধৃত ইফতিকাৰৰ ঘৰ নগাঁৱৰ ফৌজদাৰীপট্টিত । অধিক তথ্যৰ বাবে ইফতিকাৰক সোধপোচ অব্যাহত ৰাখিছে নগাঁও সদৰ আৰক্ষীয়ে ।
উল্লেখ্য যে, মঙলবাৰে নিশাও নগাঁও আৰক্ষীৰ অভিযানত ড্ৰাগছসহ গ্ৰেপ্তাৰ হৈছিল সীমা বৰা নামৰ এগৰাকী মহিলা ৷ নগাঁৱৰ ডিমৰুগুৰি চেঁচা মুখৰ পৰা আৰক্ষীয়ে বিশেষ সূত্ৰৰ ভিত্তিত অভিযান চলাই ড্ৰাগছৰ কেইবাটাও সৰু সৰু কন্টেইনাৰ, নগদ ধন আদি জব্দ কৰাৰ লগতে আটক কৰে মহিলাগৰাকীক ৷
লগতে পঢ়ক: বৰাকৰ পৰিস্থিতিক লৈ কেবিনেটত গুৰুত্বপূৰ্ণ সিদ্ধান্ত
