নগাঁও,৬আগষ্ট: এফালে উৎকট গৰম আৰু আনফালে বিদ্যুতৰ লুকাভাকু । বিদ্যুতৰ এই লুকাভাকুত এতিয়া জিয়াতু ভুগিছে ৰাজ্যবাসীয়ে । ৰাজ্যৰ অন্যান্য প্ৰান্তৰ দৰে নগাঁও জিলাটো শক্তি বিভাগৰ একে ল'ৰা ধেমালী । দিনটোৰ অধিক সময় বিনা বিদ্যুতৰ মাজতেই পাৰ কৰিব লগা হৈছে সময় ।
শেহতীয়াকৈ যোৱা কেইটা দিনত ৰাজ্যত হৈ থকা উৎকট গৰমত এতিয়া বিদ্যুৎ অবিহনে জীয়াতু ভুগিব লগা হৈছে নাগাঁওবাসীয়ে । কোনো এটা সময়ত বিদ্যুতে ভূমুকি মাৰি দেখা দিয়ে যদিওঁ অধিক সময় বন্ধ হৈ থাকে বিদ্যুতৰ যোগান ।
ইয়াৰ মাজতে দুই এক পৰিয়ালে বিদ্যুতৰ বিল সময়ত পৰিশোধ নকৰাৰ বাবেই সমগ্ৰ অঞ্চলত বিদ্যুৎ কৰ্তন কৰি জিয়াতু ভোগাইছে ৰূপহীহাটৰ এটা বৃহৎ গ্ৰামাঞ্চলক । দুই এক পৰিয়ালে বিদ্যুতৰ মাচুল সময়ত নিদিয়াৰ অভিযোগ তুলি দীৰ্ঘ দিনৰ পৰা অঞ্চলটোত বিদ্যুতৰ সংযোগ বিচ্চিন্ন কৰি থৈছে । ফলত বিদ্যুতৰ নিয়মীয়া গ্ৰাহক সকলেও ভুগিব লগা হৈছে যমৰ যন্ত্ৰণা ।
সেয়েহে বিদ্যুতৰ নিয়মীয়া যোগানৰ পৰা বঞ্চিত নগাঁৱৰ ৰূপহীহাটৰ এটা বৃহৎ অঞ্চলৰ ৰাইজ অতিষ্ঠ হৈ বৃহস্পতিবাৰে ওলাই আহিল নগাঁও চৰহত থকা শক্তি বিতৰণ কেন্দ্ৰৰ কাৰ্যালয়লৈ । কাৰ্যালয় ঘেৰাও কৰি সাব্যস্ত কৰিলে উত্তাল প্ৰতিবাদ ।
উল্লেখ্য যে, বিদ্যুৎ সংযোগ কাটি দিয়াৰ ফলত বিগত ছমাহ ধৰি বিদ্যুৎ বিহীন ভাবে চলি আছে ৰূপহীহাটৰ এটা বৃহৎ অঞ্চল ।
