কলিয়াবৰ, 25 আগষ্ট: " সি আমাৰ লগতে স্কুল পঢ়িছে, মই ভৱাই নাই, মই যে তাক ঘাপ দিছো"৷ এই শিহৰণকাৰী স্বীকাৰোক্তি এজন অভিযুক্তৰ ৷ উল্লেখ্য যে, বুধবাৰে নগাঁও জিলাৰ কলিয়াবৰত সংঘটিত হৈছিল এক চাঞ্চল্যকৰ ঘটনা ৷ জখলাবন্ধা চিকিৎসালয়ৰ সমীপত থকা বিজুস্মিতা হোটেলৰ সন্মুখৰ পৰা তেজেৰে লুতুৰি পুতুৰি অৱস্থাত উদ্ধাৰ হৈছিল পিটু দাস নামৰ লোকজনৰ মৃতদেহ (Kaliabor deadbody recover)। লোকজন এজন কৰ্মচাৰী হিচাপে কৰ্মৰত আছিল বিজুস্মিতা হোটেলত ৷
ইফালে এই হত্যাকাণ্ডৰ পিছতে পলাতক হৈ আছিল হোটেলখনত কৰ্মৰত আন এজন কৰ্মচাৰী ৷ পিছত পলাতক কৰ্মচাৰী শংকৰ চৰকাৰক বিচাৰি অভিযান অব্যাহত ৰাখিছিল জখলাবন্ধা আৰক্ষীয়ে ৷ অৱশেষত বুধবাৰে নিশা শিলঘাট আৰক্ষীৰ হাতত ধৰা পৰিল শংকৰ চৰকাৰ ৷
তাৰ পিছতে ধৃত লোকজনে আৰক্ষীৰ সন্মুখত এফালৰ পৰা দি যায় ঘটনাটোৰ সম্পূৰ্ণ বিৱৰণী ৷ তেও নিজেই পিটু দাসক হত্যা কৰা বুলি উল্লেখ কৰি আৰক্ষীক দিয়া স্বীকাৰোক্তি অনুসৰি, মঙলবাৰে দিনৰ ভাগত পিটু দাসে শংকৰ চৰকাৰৰ পৰিয়ালক লৈ কিছু কটু মন্তব্য কৰিছিল ৷ এই কটু মন্তব্যই যেন এক প্ৰকাৰে কাল হ’ল মৃত পিটু দাসৰ বাবে ৷
ইয়াৰ পিছত দুয়োৰে মাজত সৃষ্টি হয় তীব্ৰ বাক বিতণ্ডাৰ ৷ পৰিণতি স্বৰূপ দুয়োৰে মাজত বৃদ্ধি হয় সংঘাত ৷ কেৱল ইমানেই নহয় নিশাৰ ভাগত সুৰামত্ত অৱস্থাত উভয়ৰে মাজত মাৰপিটৰো সৃষ্টি হয় ৷ এনে জটিল পৰিস্থিতিত বিজুস্মিতা হোটেলৰ বাৰান্দাত পিটু দাস শুই থকা অৱস্থাত শংকৰ চৰকাৰে পিটুক বঠিৰে ডিঙি আৰু হাতত উপৰ্যুপৰি আঘাত কৰে ৷ ফলত মৃত্যু হয় পিটু দাসৰ ৷
লগতে পঢ়ক: জখলাবন্ধাৰ বিজুস্মিতা হোটেলৰ কৰ্মচাৰীক হত্যা
