নগাঁও, ২৮ নবেম্বৰঃ নগাঁৱৰ ৰাইডঙীয়াত এগৰাকী নাবালিকাক ধৰ্ষণৰ চেষ্টা কৰি ৰঙাঘৰৰ আলহী হ'বলগীয়া হয় ৭০ উৰ্ধৰ বৃদ্ধ । বুধবাৰে ঘৰত কোনো নথকাৰ সুযোগ লৈ পানী খোৱাৰ চলেৰে প্ৰথমে নাবালিকাগৰাকীৰ ঘৰৰ ভিতৰত প্ৰৱেশ কৰে ৰঞ্জিত গোহাঁই নামৰ বৃদ্ধজন । ইয়াৰ পাছতেই বৃদ্ধজনে অশ্লীল ইংগিত দি নাবালিকাগৰাকীক ধৰ্ষণৰ চেষ্টা চলায় ৷ কিন্তু নাবালিকাগৰাকীয়ে চিঞঁৰ-বাখৰ কৰাত ওচৰ চুবুৰীয়াই গোট খাই ৰঞ্জিত গোহাঁইক কৰায়ত্ত কৰি উত্তম মধ্যম শোধায় ।
নগাঁৱত নাবালিকাক ধৰ্ষণৰ চেষ্টা বৃদ্ধৰ
ঘটনাৰ খবৰ লাভ কৰি, জাজৰি আৰক্ষী উপস্থিত হৈ পৰিস্থিতি নিয়ন্ত্রণ কৰে আৰু অভিযুক্ত ৰঞ্জিত গোহাঁইক আটক কৰে । ঘটনা সংক্ৰান্তত নাবালিকাগৰাকীৰ পৰিয়ালে আৰক্ষী থানাত গোচৰ ৰুজু কৰাৰ লগতে ঘটনাৰ উচিত তদন্তৰ দাবী জনাইছে ।
