চামগুৰি, 17 অক্টোবৰ : অপৰাধ আৰু অপৰাধীৰ বিৰুদ্ধে সদায়ে সষ্টম অসম আৰক্ষী ৷ ৰাজ্যৰ ভিন্ন প্ৰান্তৰ লেখীয়াকৈ নগাঁৱৰ পৰাও উৎখাত কৰিবলৈ সক্ষম হৈছে বহু অপৰাধৰ ঘাটি ৷ ইয়াৰ মাজতে দেওবাৰে বিয়লিৰ ভাগত নগাঁও আৰক্ষীয়ে চহৰ খনৰ সমীপৰ কাতিমাৰী ওপৰ দলনী পথাৰত চলাই এক অভিযান ৷ এই অভিযানত নগাঁও আৰক্ষীয়ে উৎখাত কৰিবলৈ সক্ষম হয় ড্ৰাগছ আৰু চুৰি সামগ্ৰী জমা ৰখা এটা বৃহৎ ঘাটি ৷
নগাঁৱৰ হয়বৰগাঁও আৰক্ষী চকীৰ ভাৰপ্ৰাপ্ত আৰক্ষী বিষয়া তৰংগ পাটোৱাৰীৰ নেতৃত্বত যোৱা আৰক্ষীৰ দলটোৱে বৃহৎ সংখ্যক চুৰি সামগ্ৰী আৰু নিচাযুক্ত ঔষধ জব্দ কৰিবলৈ সক্ষম হয় । আৰক্ষীয়ে ঘাটিটোৰ পৰা দুই টেম্পু ভৰ্তি চুৰি চাইকেল, পাঁচখন মটৰ চাইকেলৰ লগতে বহু কাঁহৰ বাচন-বৰ্তন আদি উদ্ধাৰ কৰিবলৈ সক্ষম হয় । আনকি আৰক্ষীয়ে এই সন্দৰ্ভত দুজন লোকক আটক কৰিবলৈয়ো সক্ষম হয় ।
জানিব পৰা মতে, আৰক্ষীয়ে এই ঘটনা সংক্ৰান্তত আব্দুল গফুৰ আৰু আজুফা খাতুন নামৰ এগৰাকী মহিলাক আটক কৰিবলৈ সক্ষম হয় । অৱশ্যে এই চুৰি কাৰ্যৰ মাষ্টাৰ মাইণ্ড ৰফিকুল ইছলাম নামৰ যুৱকজন পলায়ন কৰিবলৈ সক্ষম হয় । আৰক্ষীয়ে উল্লেখ কৰা অনুসৰি, ৰফিকুল ইছলামৰ বিৰুদ্ধে আৰক্ষীয়ে অভিযান অব্যাহত ৰাখিছে । আনহাতে, আৰক্ষীয়ে ঘাটিটোত নিচাযুক্ত দ্ৰব্য সেৱন কৰিবলৈ যোৱা হুজগাঁৱৰ মহেন্দ্ৰ দাস নামৰ এজন লোককো আটক কৰিছে ।
লগতে পঢ়ক : বিশ্বনাথত আটক আফগানিস্তানৰ নাগৰিক
এই সন্দৰ্ভত নগাঁও আৰক্ষী অধীক্ষক আনন্দ মিশ্ৰই সংবাদ মাধ্যমৰ আগত কয় যে, নগাঁও আৰক্ষীয়ে সকলো ধৰণৰ অপৰাধজনিত কাম কাজৰ বিৰুদ্ধে অভিযান অব্যাহত ৰাখিছে । এই ক্ষেত্ৰত নগাঁও আৰক্ষী যথেষ্ট সফল হৈছে । চুৰি ডকাইতিকে ধৰি বিভিন্ন অপৰাধ জনিত ঘটনাৰ লগত জড়িত অথবা ড্ৰাগছ ব্যৱসায়ৰ লগতো জড়িত কোনো লোককে ৰেহাই দিয়া নহ’ব ।
এনেবোৰ কাম কাজৰ বিৰুদ্ধে নগাঁও আৰক্ষীৰ অভিযান অব্যাহত থাকিব । লগতে আৰক্ষী অধীক্ষক গৰাকীয়ে কয় যে, হয়বৰগাঁও আৰক্ষী চকীৰ ভাৰপ্ৰাপ্ত বিষয়া তৰংগ পাটোৱাৰীয়ে দক্ষতাৰে কাম কৰি অপৰাধ জনিত ঘটনা ৰোধ কৰাত গুৰুত্বপূৰ্ণ ভূমিকা গ্ৰহণ কৰিছে । নগাঁও আৰক্ষীয়ে নিচাযুক্ত দ্ৰব্য সেৱন কৰা বহু যুৱক-যুৱতীক স্বাভাবিক অৱস্থালৈ ঘূৰাই আনিবলৈ সক্ষম হৈছে ।
আনহাতে, পলাতক ৰফিকুল ইছলাম এজন দুধৰ্ষ অপৰাধী । মটৰচাইকেল, চাইকেল, কাঁহৰ বাচন-বৰ্তনকে ধৰি বিভিন্ন সামগ্ৰী চুৰি কাৰ্যত ৰফিকুল ইছলাম জড়িত । শীঘ্ৰে ৰফিকুল ইছলামক কৰায়ত্ব কৰিবলৈ নগাঁও আৰক্ষী সক্ষম হ’ব বুলি আৰক্ষী অধীক্ষক গৰাকীয়ে মন্তব্য কৰে ।
লগতে পঢ়ক : Cattle syndicate : প্ৰতিদিনে বেপাৰীয়ে পাৰ কৰিছে শ শ গৰু
