নগাঁও, ২ নৱেম্বৰ : ন্যায়িক যুঁজত সহায় কৰাৰ নামত ৰামঠগন । অধিবক্তাৰ বেশত নগাঁও আদালত চৌহদত প্ৰৱঞ্চকৰ টিঘিল ঘিলনী । অৱশেষত আচামীৰ জামিনৰ ব্যৱস্থা কৰাৰ বাবদ ধন দাবী কৰি নগাঁও আৰক্ষীৰ জালত পৰিল এটা প্ৰৱঞ্চক । দৰাচলতে, পৱিত্ৰ হাজৰিকা নামৰ এজন ভুৱা অধিবক্তাক লৈ সোমবাৰে নগাঁও জিলা আৰু সত্ৰ ন্যায়াধীশৰ আদালত চৌহদত উত্তপ্ত পৰিস্থিতিৰ সৃষ্টি হয় ।
POCSO আইনৰ অধীনত ৰুজু হোৱা এটা গোচৰত অভিযুক্ত এজন আচামীক জামিন লাভৰ ব্যৱস্থা কৰি দিয়াৰ বাবদ ৫০ হাজাৰ টকা দাবী কৰিছিল ভুৱা অধিবক্তা পৱিত্ৰ হাজৰিকাই । প্ৰকৃততে আচামীজনৰ অধিবক্তা আছিল দিব্য প্ৰসাদ বৰা নামৰ এজন অধিবক্তাহে । আচামীজনৰ গোচৰটো অধিবক্তা বৰাই চলাই থকাৰ মাজতে ভুৱা অধিবক্তা পৱিত্ৰ হাজৰিকাই জামিন কৰাই দিয়াৰ নামত যোৱা ৩০ অক্টোবৰৰ পৰা ৫০ হাজাৰ টকা দাবী কৰি আছিল ।
এই কথা জানিব পাৰি অধিবক্তা দিব্য প্ৰসাদ বৰাই সোমবাৰে পৱিত্ৰ হাজৰিকাৰ বিৰুদ্ধে নগাঁও সদৰ আৰক্ষী থানাত এখন এজাহাৰ দাখিল কৰে । উক্ত এজাহাৰৰ ভিত্তিত আৰক্ষীয়ে এক গোচৰ ৰুজু কৰি আদালত চৌহদৰ পৰাই বিভিন্ন আপত্তিজনক নথি-পত্ৰসহ পৱিত্ৰ হাজৰিকাক গ্ৰেপ্তাৰ কৰে । পৱিত্ৰ হাজৰিকাৰ ঘৰ কামপুৰত ।
উল্লেখ্য যে, পৱিত্ৰ হাজৰিকাই দীৰ্ঘদিন ধৰি বিভিন্ন লোকৰ পৰা গোচৰ-মোকৰ্দমা চলোৱাৰ নামত ধন সংগ্ৰহ কৰাৰ অভিযোগ উত্থাপিত হৈছে । আনকি, পৱিত্ৰ হাজৰিকাক অধিবক্তাৰ সাজত প্ৰায়ে নগাঁও আদালত চৌহদত দেখিবলৈ পোৱা যায় বুলি জানিবলৈ দিয়ে একাংশ অধিবক্তাই । অধিবক্তাৰ সহযোগত গ্ৰেপ্তাৰ কৰা ভুৱা অধিবক্তা পৱিত্ৰ হাজাৰিকাক অধিক তথ্যৰ বাবে জেৰা অব্যাহত ৰাখিছে নগাঁও আৰক্ষীয়ে ।
লগতে পঢ়ক : এবছৰত ৰাজ্যত আত্মহননৰ ঘটনা 36.8 শতাংশলৈ বৃদ্ধি
