ৰহা, ১৭ মে': বিধ্বংসী অগ্নিকাণ্ডই প্ৰাণ ল'লে ৰহাৰ এজন যুৱকৰ । সোমবাৰে পুৱাই ৰহাৰ মেটেকা অঞ্চলৰ নিবাসী পুৰোহিত শিৱ শৰ্মাৰ ঘৰত ভয়াৱহ অগ্নিকাণ্ড সংঘটিত হয় । সেই সময়ত শৰ্মাৰ পুত্ৰ ৰাজদ্বীপ শৰ্মা বিচনাত শুই আছিল । হঠাতে জুইৰ লেলিহান শিখাই আগুৰি ধৰে গোটেই ঘৰটো ।
জীৱন্তে অগ্নিদগ্ধ হয় ৰাজদ্বীপ শৰ্মা । ঘটনা সংঘটিত হোৱাৰ পাছতেই ৰহা আৰক্ষী আৰু ৰহাৰ অগ্নি নিৰ্বাপক বাহিনীৰ ঘটনাস্থলীত উপস্থিত হয় আৰু জুই নুমুৱাবলৈ সক্ষম হয় । আনহাতে, অগ্নিদগ্ধ যুৱকজনক আৰক্ষীয়ে নিজা বাহনেৰে সংকটজনক অৱস্থাত নগাঁও অসামৰিক চিকিৎসালয়লৈ নিয়ে যদিও চিকিৎসালয়তে তেওঁৰ মৃত্যু হয় ।
ইফালে, ভয়াৱহ অগ্নিকাণ্ডত শিৱ শৰ্মাৰ বাসগৃহৰ প্ৰায় ১৫ লক্ষাধিক টকাৰ সম্পত্তি জ্বলি ছাঁই হয় । ৰাজদ্বীপ শৰ্মা সামাজিক-সাংস্কৃতিক সংগঠন 'নৱ আলোক'ৰ সভাপতি আছিল ।
লগতে পঢ়ক:ক’ভিড মুক্ত গাঁৱলৈ পৰিণত টীয়কৰ এখন গাঁও
