কলিয়াবৰ, 17 আগষ্ট : জাতিটোক একতাৰ ডোলেৰে বান্ধি বৈকুণ্ঠ প্ৰয়াণৰ পবিত্ৰ মাহটোত গুৰু দুজনাক স্মৰণ কৰিব ৰাজ্যবাসীয়ে ৷ আজিৰে পৰা আৰম্ভ হৈছে অসমীয়া জাতিৰ পবিত্ৰ মাহ ভাদ । মহাপুৰুষ শ্ৰীমন্ত শংকৰদেৱ, শ্ৰীশ্ৰী মাধৱদেৱৰ তিৰোভাৱ তিথি এই ভাদ মাহতে ৷ তদুপৰি শ্ৰীকৃষ্ণৰ জন্ম হৈছিল এই পবিত্ৰ ভাদ মাহতে ।
ভাদ মাহ বুলিলেই মনলৈ আহে কীৰ্তন ঘোষাৰে মুখৰিত এক পবিত্ৰ পৰিৱেশৰ কথা । আধ্যাত্মিকতা গঢ়াৰ প্ৰধান সোপান ল’ব পাৰি ভাদ মাহতে । কাৰণ অসমীয়াৰ বাৰ মাহৰ ভিতৰত আটাইতকৈ পবিত্ৰ মাহ হ’ল ভাদ মাহ । ভক্তিৰসেৰে পূৰ্ণ এই মাহৰ প্ৰতিটো দিনেই পবিত্ৰ ।
পবিত্ৰ মনতহে ঠাই লয় আধ্যাত্মিকতাই ৷ নামঘৰে নামঘৰে, সত্ৰই সত্ৰই জ্বলোৱা ধূপ-ধূনা, চন্দনৰ গোন্ধই মানুহৰ মনটো আধ্যাত্মিকতাৰ গভীৰতালৈ নিয়ে । য’ত থাকে ঈশ্বৰ চিন্তাৰ প্ৰাসংগিকতা । সত্ৰ-নামঘৰবোৰত পুৱা, দুপৰীয়া, আবেলি, গধূলি এই চাৰি প্ৰসংগত গোৱা হৰি নামৰ ধ্বনিয়ে হৃদয়ৰ পৰা হৃদয়লৈ আধ্যাত্মিকতা বিস্তাৰ কৰে ৷
লগতে চাওক: ওপজা দিনত বিহু সম্ৰাট খগেন মহন্তলৈ শ্ৰদ্ধাঞ্জলি...
