চামগুৰি,17 জুলাই: সোমবাৰে বুঢ়াচাপৰিত হোৱা গুলীচালনা ঘটনাৰ সন্দৰ্ভত সৰব হ’ল ৰুপহীহাটৰ বিধায়ক নুৰুল হুদা ৷ দিনৰ ভাগত বুঢ়াচাপৰিৰ লাঠিমাৰি উচ্ছেদস্থলীত পুনৰ বেদখলকাৰীয়ে বসতি কৰিবলৈ লোৱাত বনকৰ্মীয়ে আঁতৰি যাবলৈ কোৱাত এক উত্তপ্ত পৰিস্থিতিৰ সৃষ্টি হয় ৷ বেদখলকাৰীয়ে বনকৰ্মীক চোকা অস্ত্ৰৰে আক্ৰমণ কৰাত বনকৰ্মীয়ে গুলীচালনা কৰিব লগীয়া হয় ৷ যাৰ ফলত বনকৰ্মী সহ 5 জন আহত আৰু এগৰাকী মহিলা নিহত হয় ৷ নিহত মহিলা গৰাকী চিতলমাৰীৰ ফাতেমা খাতুন বুলি জানিব পৰা গৈছে ৷ আনহাতে আহতসকল আহমদ আলী, ৰমজান আলী, শমশ্বেৰ আলী আৰু ৰহিমা খাতুন ।
এই ঘটনাক কঠোৰ ভাষাৰে নিন্দা প্ৰকাশ কৰিছে বিধায়ক নুৰুল হুদাই ৷ আহত লোকৰ স্বাস্থ্যৰ বুজ লবলৈ বিধায়ক নুৰুল হুদা উপস্থিত হয় চিকিৎসালয়ত ৷ ‘‘ভূমিহীন নিৰীহ লোকৰ ওপৰত গুলীচালনাৰ ঘটনা দুৰ্ভাগ্যজনক । এনে বন বিভাগ আমাক নালাগে ৷ উচ্ছেদিত লোকসকলে বান পৰিস্থিতিৰ বাবে উক্ত স্থানত বসতি কৰিবলৈ আৰম্ভ কৰিছিল ৷ দেওবাৰে বন বিভাগৰ লোক উপস্থিত হোৱাত উচ্ছেদিত লোকসকলে বান পৰিস্থিতি উন্নত হোৱালৈকে বসবাসৰ অনুমতি লৈছিল বন বিষয়াৰ পৰা ৷ কিন্তু আজি শোণিতপুৰৰ বন বিভাগৰ লোক আহি যধে-মধে গুলীচালনা কৰে ৷ এনেদৰে অত্যাচাৰ কৰিব নাপায় এই সকল নিৰীহ মানুহক ৷’’
